Arsyeja e veçantë që Mancini zëvendësoi portierët në minutën e fundit të ndeshjes

Italia ka marrë edhe fitoren e tretë në po aq ndeshje të zhvilluara deri më tani në Kampionatin Evropian.

Azzurët kanë dalë nga Grupi A si lider me pikë maksimale, derisa mposhtën Turqinë (3-0), Zvicrën (3-0) dhe Uellsin ditën e djeshme (1-0).

Por ajo që befasoi të gjithë ditën e djeshme ishte zëvendësimi i portierit në minutën e 89-të.

Tekniku italian largoi nga loja portierin titullar, Gianluigi Donnarumma dhe e inkuadroi në ndeshje Salvatore Sirigun që është portieri i dytë i Italisë.

Të gjithë u befasuan me këtë zëvendësim në fund të ndeshjes, por trajneri Roberto Mancini kishte një arsye të fortë pse e bëri atë.

Trajneri aktual i Italisë ishte pjesë e Kombëtares italiane në botërorin e vitit 1990 kur Azzurët e fituan vendin e tretë.

Në atë kampionat, ishte pikërisht Mancini lojtari i vetëm që nuk luajti asnjë minutë për Italinë.

Kësisoj Mancini nuk dëshiron që t’i lë futbollistët e grumbulluar pa luajtur së paku një minutë në Evropian.

Tani te Italia në tri ndeshjet e para kanë luajtur 25 futbollistë dhe vetëm njëri nga ta ende nuk ka shijuar minutat.

I vetmi që nuk ka luajtur ende asnjë minutë është portieri i tretë Alex Meret. /Telegrafi/