Arrestohet një aktivist i ekstremit të majtë për sulmet në rrjetin e trenave të Francës përpara Olimpiadës së Parisit

Një aktivist i ekstremit të majtë është arrestuar në lidhje me një seri sulmesh në rrjetin e trenave me shpejtësi të lartë të Francës që shkaktuan kaos udhëtimesh përpara ceremonisë së hapjes së Olimpiadës në Paris.

Ministri i Brendshëm i Francës konfirmoi raportet e mediave për një arrestim të bërë në Seine-Maritime, Normandi.

Bëhet e ditur se arrestimi vjen pasi raportet franceze thanë se instalimet e telekomit që i përkasin kompanive SFR dhe Bouygues Telecom janë vandalizuar, duke prekur kryesisht shërbimet e linjës fikse.

Raportet në gazetën Le Parisien dhe BFM TV thanë se kabllot në kabinetet elektrike ishin prerë në Francën jugore dhe se instalimet në rajonin Meuse pranë Luksemburgut dhe zonën Oise afër Parisit ishin shënjestruar.

Nuk ishte menjëherë e qartë nëse vandalizmi i telekomit ishte i lidhur me sulmin hekurudhor që prishi fillimin e Olimpiadës në Paris, shkruan skynews, përcjell Telegrafi.

Siç raportohet, vandalët përdorën pajisje shpërthyese për të ndezur zjarre të cilat dëmtuan kutitë e sinjalit përgjatë linjave që lidhin kryeqytetin me qytete të tilla si Lille në veri, Bordeaux në perëndim dhe Strasburg në lindje.

Lexo po ashtu Kush qëndron pas sabotimit të rrjetit hekurudhor të Francës?

Qindra mijëra njerëz mbetën të bllokuar në stacione pas sulmeve në rrjetin TGV, të cilat autoritetet i quajtën sabotim të koordinuar.

Shërbimet me shpejtësi të lartë të Eurostar që lidhin Londrën dhe Parisin u detyruan të kalonin në linja më të ngadalta ndërsa kompania hekurudhore kombëtare gjermane Deutsche Bahn paralajmëroi për ndërprerje të shërbimeve në distanca të gjata.

Trafiku u kthye në normalitet së fundmi, por vetëm pasi rreth 800,000 klientë ishin përballur me ndërprerje.

Ndryshe, ceremonia e hapjes së Lojërave Olimpike u mbajt nën masa të rrepta sigurie.

Më shumë se 300,000 spektatorë u rreshtuan në brigjet e lumit Seine për ceremoninë e hapjes ku atletët parakalojnë nëpër zemër me anije.

Franca vendosi 45,000 policë, 10,000 ushtarë dhe 2,000 agjentë privatë të sigurisë për të siguruar ngjarjen festive.

Snajperët ishin në çati dhe dronët ruanin nga ajri. /Telegrafi/