Një nga bosët më të fuqishëm të drogës në botë, Ismael "El Mayo" Zambada, lider i kartelit Sinaloa të Meksikës, është arrestuar nga agjentët federalë amerikanë në El Paso, Teksas.
Zambada, 76 vjeç, themeloi organizatën kriminale me Joaquin "El Chapo" Guzman, i cili aktualisht është i burgosur në SHBA.
I arrestuar me Zambadan ishte edhe djali i Guzman, Joaquin Guzman Lopez, tha departamenti i drejtësisë amerikane, raporton bbc.
Në muajin shkurt, Zambada u akuzua nga prokurorët amerikanë për prodhim dhe shpërndarje të fentanyl, drogë më e fuqishme se heroina, transmeton Telegrafi.
Në një deklaratë me shkrim të enjten në mbrëmje, Prokurori i Përgjithshëm i SHBA-së, Merrick Garland tha se të dy burrat udhëheqin "një nga organizatat më të dhunshme dhe më të fuqishme të trafikut të drogës në botë".
Ismael "El Mayo" Zambada (majtas) dhe Joaquin Guzman Lopez
"El Mayo dhe Guzman Lopez i bashkohen një liste në rritje të drejtuesve dhe bashkëpunëtorëve të kartelit Sinaloa, të cilët Departamenti i Drejtësisë po i mban përgjegjës në Shtetet e Bashkuara", tha ai.
“Fentanyl është më vdekjeprurës se droga me të cilin është përballur ndonjëherë vendi ynë dhe Departamenti i Drejtësisë nuk do të pushojë derisa çdo udhëheqës i kartelit, anëtar dhe bashkëpunëtor përgjegjës për helmimin e njerëzve tanë të mbahen përgjegjës”, shtoi Garland, oficeri më i lartë i zbatimit të ligjit në Shtetet e Bashkuara.
Prokurorët amerikanë thonë se karteli Sinaloa është furnizuesi më i madh i drogës në SHBA.
Autoritetet amerikane kanë vërejtur më parë se fentanili është shkaku kryesor i vdekjes së amerikanëve të moshës 18 deri në 45 vjeç.
Ndryshe, Administrata Amerikane e Zbatimit të Drogës (DEA) kishte ofruar një shpërblim deri në 15 milion dollarë (14 milionë euro) për kapjen e Zambadas. /Telegrafi/
