Argjentina ka kaluar në finale të Kupës së Amerikës, pasi arriti të eliminonte Kolumbinë përmes penalltive, me kohën e rregullt që përfundoi 1-1.
Pas vetëm shtatë minutash lojë, argjentinasit kaluan në epërsi me anë të Lautaro Martinez që u asistua nga Lionel Messi.
Ishte minuta e 37-të kur erdhi shansi i parë për Kolumbinë, mirëpo atë e shpërdoroi Wilmar Barrios.
Në 45 minutat e dytë, ishin kolumbianët që e filluan më mirë, pasi German Pezzella u dyshua se luajti me dorë, por pas konsultimit me VAR-in, u bë e ditur se loja duhet të vazhdonte.
Momenti më i mirë për Kolumbinë erdhi në minutën e 61-të, kur Luis Diaz arriti të tunde rrejtën e Argjentinës me sukses, për t’i barazuar shifrat në 1-1.
Lautaro (73’) lëshoi një mundësi të artë, pasi nuk arriti të fute topin në portën e zbrazët, me një lojtar kolumbian që e largoi para saj.
Ndeshja më pas shkoi direkt në gjuajtjen e penalltive.
Argjentina ishte më e saktë nga 11-metrshat, pasi realizuan tre, për dallim nga Kolumbia me dy. /Telegrafi/
