Deontay Wilder ka pranuar se do ta shikojë meçin ndërmjet Anthony Joshuas dhe Joseph Parkerit, dhe do të presë nëse boksieri britanik do ta paralajmërojë një duel me të.
Sonte (e shtunë, 31 mars) në Principality Stadium të Cardiffit zhvillohet dueli për unifikimin e titujve, IBF, WBA (Joshua) dhe WBO (Parker).
Fituesi do ta shkruajë historinë, ndërsa Wilder pret që AJ t'i tregojë planet e tij menjëherë pas meçit, natyrisht nëse del fitues.
Boksieri amerikan është posedues i titullit WBC dhe natyrisht se Joshua do të dëshironte ta ketë edhe atë rrip, ndërkohë që të gjithë tifozët e boksit ëndërrojnë një duel mes Joshuas dhe Wilderit.
Wilder ka thënë se dyshon shumë nëse Joshua dëshiron të përballet me të, por dëshiron ta dëgjojë nga goja e kampionit se çfarë dëshiron të bëjë.
"Njerëzit duan të dëgjojnë se çfarë thonë boksierët, jo çfarë thonë promovuesit. Kjo gjë është bërë fëmijërore, shumë fëmijërore. Asnjëherë nuk kam menduar se do të më duhej të përjetoja kaq shumë gjëra për t'i unifikuar titujt ose për të siguruar një duel që e duan njerëzit".
"Një meç mes meje dhe Joshuas është folur shumë më tepër sesa ai mes tij dhe Parkerit... Vetëm thuaj se nuk e do. Vetëm thuaj se nuk do të ndeshesh me mua. Madje mund të thuash se është meç të cilin e do, por nuk dëshiron që ta bësh tash".
"Mirëpo, pas meçit? Do të shohim. Do të jem si të gjithë ju, duke qëndruar dhe duke pritur se a do ta thotë emrin tim. Do të jem ulur këtu në shtëpinë time duke menduar njësoj si ju: A do të thotë ai diçka për Wilderin? Kjo është pyetja e madhe".
"Ajo që unë dua të ndodhë dhe ajo që do të ndodhë në realitet, janë dy gjëra të ndryshme. Unë dua që ai ta thotë emrin tim dhe do ta zhvillojmë përballjen një herë e përgjithmonë", ka deklaruar Wilder për Sky Sports. /Telegrafi/