Todd Snider, këngëtari dhe kompozitori i njohur i muzikës Americana dhe alt-country, ka ndërruar jetë në moshën 59 vjeç.
Lajmi u konfirmua nga familja dhe llogaritë zyrtare të artistit në rrjete sociale. Edhe pse nuk u dha një shkak zyrtar i vdekjes, familja bëri të ditur se Snider ishte shtruar së fundmi në spital me pneumoni.
Shtëpia diskografike e tij, Aimless, Inc., e përshkroi Sniderin si një “Hero Popullor, Poet i Botës dhe Tregimtar i jashtëzakonshëm”, duke vlerësuar ndikimin e tij në muzikë dhe mënyrën se si këngët e tij ofronin perspektiva të reja dhe emocione të thella për adhuruesit, shkruan The Guardian.
Snider ishte gjithashtu i njohur për durimin e dhimbjeve kronike nga stenozë e shtyllës kurrizore.
Ky problem shëndetësor kishte çuar më herët në anulimin e disa shfaqjeve të tij, përfshirë një koncert të planifikuar në Salt Lake City.
I lindur në Portland, Oregon, Snider u shpërngul në Teksas gjatë viteve 1980, ku u takua me Jerry Jeff Walker, mentor i tij i rëndësishëm.
Në vitet 1990, ai u vendos në Nashville dhe u bë një figurë kyçe e skenës alt-country, duke lënë pas albume të paharrueshme si East Nashville Skyline të vitit 2004. /Telegrafi/