Xherdan Shaqiri ka shprehur publikisht pakënaqësinë e tij e mos inkuadrimit të tij te Liverpooli.
Anësori shqiptar ka thënë se ai nuk është i lumtur që nuk po luan te The Reds, por ka zbutur qëndrimin e tij kur është pyetur për vendimet e Jurgen Kloppit.
“Sigurisht që jam i pakënaqur që nuk po luaj. Po stërvitem me skuadrën dhe dua ta ndihmojë atë, por që ende nuk e di kur do ta kem mundësi më të mëdha”, ka thënë lojtari nga Zhegra e Gjilanit.
“Klopp nuk mund të diskutojë rolin e secilit lojtarë, kjo është normale. Kemi skuadër të mirë dhe duhet të presim për shansin tonë. Nuk kam pasur ndonjëherë problem me trajnerin”.
“E di që jam gati dhe dua të luajë më shumë. Por, unë respektoj vendimet e trajnerit dhe do të shohim çfarë do të ndodhë në të ardhmen”, ka deklaruar më tej Shaqiri.
Liverpooli vazhdon të jetë skuadër e pamposhtur në Ligën Premier, pasi pas javës së tetë ka arritur t’i fitojë që të gjitha takimet dhe është lider i ligës me 24 pikë. /Telegrafi/