Nga Chanel te Dior dhe Schiaparelli – ja cilat yje e kthyen tapetin e kuq në festë elegance
Mbrëmë në Los Angeles, tapeti i kuq i edicionit të 83-të të Golden Globe u shndërrua në një skenë ku glamuri dhe eleganca klasike fituan bindshëm ndaj trendeve të zhveshjes së tepruar. Pas disa vitesh ku provokimi dominonte titujt, këtë herë yjet u rikthyen te madhështia, siluetat e rafinuara dhe moda si art.
Edhe pse disa emra të zakonshëm, si Jennifer Lopez, nuk u përfshinë në listat e më të veshurave më bukur, mbrëmja solli një sërë paraqitjesh që do të mbahen mend.
Selena Gomez ishte pa dyshim figura qendrore e mbrëmjes. Ajo shkëlqeu në një fustan Chanel, për të cilin, sipas CNN, janë dashur plot 320 orë punë artizanale. E nominuar për të katërtin vit radhazi për rolin e saj në serialin “Only Murders in the Building”, Selena zgjodhi një stil që i bënte homazh glamurit të epokave të arta të Hollywood-it, duke dëshmuar se eleganca klasike është gjithmonë fituese. Në tapetin e kuq u shfaq në shoqërinë e të fejuarit të saj, producentit Benny Blanco, dhe të dy u konsideruan një nga çiftet më elegantë të mbrëmjes, transmeton Telegrafi.
Emma Stone, fituese e Oskarit, u paraqit me një krijim Louis Vuitton që ndau opinionin publik. Disa e panë si një zgjedhje artistike dhe të guximshme, ndërsa të tjerë u habitën pse kishte zgjedhur një stil kaq të pazakontë për një mbrëmje kaq formale. Megjithatë, si gjithmonë, Emma Stone arriti të mbetet në qendër të vëmendjes.
Chase Sui Wonders vazhdon të forcojë statusin e saj si një nga emrat më interesantë të modës dhe këtë e konfirmoi edhe këtë herë me një fustan Balenciaga, që rikujtonte glamurin klasik të kësaj shtëpie mode, përpara periudhave të saj më kontroverse. Kritika e vlerësoi këtë paraqitje si një kthim elegant te rrënjët e modës së lartë.
Ayo Edebiri u shfaq me një krijim Chanel dhe me të drejtë u përfshi në listat e më të veshurave më bukur. Stili i saj ishte shembull i elegancës së pastër dhe i thjeshtësisë luksoze që Chanel di ta ofrojë gjithmonë.
Amal Clooney mahniti kritikët me një fustan vintage Balmain, duke dëshmuar edhe një herë se stili i saj i sofistikuar dhe inteligjent është gjithmonë në nivelin më të lartë dhe se moda klasike nuk ka nevojë për zhurmë për të lënë përshtypje.
Teyana Taylor, e cila fitoi çmimin për aktoren më të mirë dytësore, zgjodhi një krijim Schiaparelli, duke përfaqësuar anën më avangarde dhe artistike të modës. Ajo tregoi edhe një herë se di ta mbajë provokimin me klas dhe ta shndërrojë në deklaratë stili.
Jenna Ortega u vlerësua nga kritika e Vogue për paraqitjen e saj ekscentrike në një model nga Dilara Findikoglu, duke dëshmuar se brezi i ri i yjeve po sjell gjithnjë e më shumë guxim dhe individualitet në tapetin e kuq.
Në mbrëmje u panë edhe Kate Hudson në një fustan Armani, Mia Goth me një krijim Dior, Rose Byrne e veshur në Chanel, si dhe Jessie Buckley që mbrojti elegancën klasike të Dior – të gjitha paraqitje që plotësuan një panoramë ku stili, mjeshtëria dhe identiteti personal u vunë mbi sensacionalizmin.
Golden Globe 2026 tregoi qartë se tapeti i kuq po rikthehet te madhështia, mjeshtëria dhe eleganca, dhe se moda më e fortë është ajo që nuk ka nevojë të bërtasë për t’u vënë re. Dhe në këtë rikthim të glamurit, Selena Gomez mbeti pa dyshim ikona absolute e mbrëmjes. /Telegrafi/