Rita Ora ka ndarë së fundmi me ndjekësit e saj në Instagram një set të ri fotografik që tërheq vëmendjen jo vetëm për stilin elegant, por edhe për estetikën e veçantë që e shoqëron.
Në këtë editorial të kuruar deri në detaj, Rita shfaqet me një pamje që bashkon hijeshinë klasike me një frymë moderne dhe teatrale.
Flokët me ngjyrë rozë të lehtë, të stiluar në mënyrë voluminoze dhe me prekje retro, krijojnë një kontrast të bukur me fytyrën e saj të butë dhe grimin delikat, ku dallohet qartë dora profesionale e artistëve të makijazhit.
Fotot janë realizuar nga Armin Morbach, i cili ka arritur të kapë një atmosferë intime dhe dramatike, ku çdo detaj ndihmon në ndërtimin e një narrativi vizual mbresëlënës.
Në një prej fotove, Rita shfaqet e shtrirë në një strukturë druri, e veshur me një fustan dantelle të bardhë që vjen si një përzierje e romantizmit klasik me sensualitetin bashkëkohor.
Në një tjetër imazh, ajo qëndron pranë një grumbulli karrigesh prej druri, të vendosura në mënyrë artistike në një sfond të errët tekstili, duke krijuar një ndjesi tensioni vizual që përforcon mesazhin e forcës dhe qëndrueshmërisë.
Ky set fotografik është më shumë sesa një bashkëpunim i suksesshëm me një markë të njohur si Armani Beauty – është një deklaratë e qartë se Rita Ora vazhdon të sfidojë kufijtë mes muzikës, modës dhe artit pamor.
Ajo nuk pozon vetëm për një reklamë, por rrëfen një histori me trupin, stilin dhe prezencën e saj të palëkundur. /Telegrafi/