Komuna e Prishtinës edhe sot do të vazhdoj testimin e shndërrimit të unazës qendrore në qarkore njëkahëshe për automjetet.
Ky ‘eksperiment’ i komunës i cili nisi të premten e do të përfundoj sot, në ditën e parë të testimit shkaktoi shumë tollovi e bllokim të rrugëve të kryeqytetit nga veturat, e rrjedhimisht edhe tensionim të qytetarëve, të cilët prisnin për orë të tëra në kolona të gjata.
Kryetari i Prishtinës, Përparim Rama, tha se një testim i tillë në ditë pune u ka mundësuar të identifikojnë fytet e ngushta në rrugë.
Ai bëri të ditur se kanë pranuar edhe mesazhe me propozime e rekomandime konkrete për të ofruar një zgjidhje përfundimtare “për komunikacionin e ngarkuar të kryeqytetit tonë”, tha Rama.
Të dhënat që po i mbledh Taskforca do të shndërrohen në rekomandime për Komunën e Prishtinës, në mënyrë që të bëhen ndryshime infrastrukturore për ta rregulluar trafikun në unazën kryesore të kryeqytetit që mundëson qarkullimin njëkahor dhe për ta zgjatur sheshin deri te Katedralja, “Nënë Tereza”.
E ekspertët e komunikacionit kanë vlerësuar se ky testim mund të rezutlojë i suksesshëm vetëm me një transport publik më funksional.
Qarkorja njëkahëshe gjatë këtyre ditëve do të jetë funksionale në drejtim të rrugëve:- Rruga “Agim Ramadani” që nga semaforët pranë ish-menzës së Studentëve e deri te rreth-rrotullimi prapa ndërtesës së Komunë- Rruga “UÇK” nga Parlamenti e deri te ish-Kino Rinia.- Rruga “Migjeni” deri te ndërtesa e ish-OSBE- Rruga “Luan Haradinaj” deri te semaforët pranë Bankës Qendrore- Rruga “Ukshin Hoti”- Rruga “Robert Doll”. /Telegrafi/