Nëse punoni shumë, por ende nuk keni fitimet që shpresoni, rishikoni zakonet që mund të pengojnë rritjen tuaj financiare dhe për të cilat mund të mos jeni në dijeni
Shpesh dëgjojmë se nëse investojmë në diçka dhe punojmë, punojmë, punojmë, suksesi nuk do të dështojë. Por realiteti është më kompleks. Shumë njerëz punojnë shumë dhe ende luftojnë për të siguruar një jetesë të mirë. Dhe kjo nuk është për shkak se atyre u mungon ambicia apo përkushtimi; shpesh kjo është për shkak të disa zakoneve të rrënjosura dhe mënyrave të të menduarit që në mënyrë të pandërgjegjshme i pengojnë dhe ata nuk janë të vetëdijshëm për to.
Pra, nëse jeni duke punuar shumë, por nuk po merrni fitimet që do të kishit shpresuar, hidhini një sy më mirë 7 sjelljeve që mund t'ju pengojnë. Pasi t'i njihni dhe t'i përshtatni ato, do të gjeni çelësin për t'i transformuar përpjekjet tuaja në rritje reale financiare, transmeton Telegrafi.
1. Nuk e shohin panoramën e gjerë
“Nëse njeriu nuk e di se në cilin port po lundron, asnjë erë nuk është e favorshme”, është mendimi i famshëm i Senekës. Një faktor i zakonshëm te njerëzit që nuk duken se bëhen kurrë të pasur është se shpesh u mungon një perspektivë më e gjerë financiare. Ata shpesh janë aq të fokusuar në aktivitetet e përditshme, detyrat dhe projektet, saqë neglizhojnë rëndësinë e planifikimit strategjik financiar. Ky përfshin buxhetin, kursimin, investimin dhe krijimin e më shumë burimeve të të ardhurave.
Pa një plan financiar, i gjithë ai punë i mundimshëm shpesh shndërrohet thjesht në mbijetesë, jo në përparim. Njerëzit më të pasur nuk janë domosdoshmërisht ata që punojnë më shumë, por ata që menaxhojnë me mençuri paratë e tyre.
2. Bien në grackën e inflacionit të stilit të jetesës
Kur fillojnë të fitojnë më shumë, ata edhe shpenzojnë më shumë. Ky fenomen njihet si “inflacion i stilit të jetesës”. Në vend se të kursejnë ose të investojnë të ardhurat shtesë, ata e përmirësojnë stilin e jetesës për ta përshtatur me rrogën e re. Nga darkat më të shpeshta në restorante e deri tek rrobat më të shtrenjta, shpenzimet fillojnë të rriten paralelisht me të ardhurat. Është e lehtë të arsyetosh një makinë më luksoze ose një shtëpi më të madhe kur fiton më shumë, por kjo shpesh ju pengon të grumbulloni pasuri, sepse rrit ndjeshëm kostot tuaja.
3. Neglizhojnë investimin në vetvete
Shumë njerëz e lidhin investimin vetëm me aksione, obligacione apo prona, por shpesh harrohet fusha më e rëndësishme për investim - vetja jonë. Studimet e konfirmojnë këtë. Socioekonomisti Randal Bell, që ka studiuar suksesin për mbi dy dekada, vëren: “Ata që lexojnë shtatë ose më shumë libra në vit kanë mbi 122% më shumë gjasa të bëhen milionerë, krahasuar me ata që nuk lexojnë fare ose lexojnë vetëm një deri në tre libra.”
Mësimi i vazhdueshëm dhe zhvillimi i aftësive, qoftë përmes arsimit formal, kurseve online apo leximit, hapin dyer drejt mundësive më fitimprurëse.
4. Injorojnë rëndësinë e rrjetëzimit
Shumë rrallë arrihet sukses në izolim. Një rrjet i fortë krijon mundësi që ndryshe nuk do të ishin të arritshme, një ofertë pune, një partneritet biznesi apo një rast për investim. Këto janë elemente që ndikojnë dukshëm në rritjen financiare. Investoni kohë dhe përpjekje në ndërtimin e marrëdhënieve domethënëse, si profesionale ashtu edhe personale. Kjo bën dallim të madh në karrierë dhe në financa.
5. Marrin shumë rreziqe
Rreziku shpesh frikëson, sidomos kur bëhet fjalë për paratë tuaja të fituara me mund. Por rritja financiare zakonisht kërkon daljen nga zona e rehatisë dhe marrjen e rreziqeve të llogaritura. Çdo njeri i suksesshëm ka rrezikuar në një moment: investimi në aksione, nisja e një biznesi apo edhe ndërrimi i karrierës për një punë më të paguar – të gjitha përfshijnë një nivel rreziku, por edhe potencial fitimi. Çelësi nuk është rreziku i pamenduar, por ai i maturuar. Informohuni, vlerësoni avantazhet dhe disavantazhet, dhe merrni vendime mbi bazën e fakteve.
6. Nënvlerësojnë fuqinë e të ardhurave pasive
Puna e palodhur është e domosdoshme për sukses financiar, por nuk është e vetmja rrugë. Shumë njerëz harrojnë fuqinë e të ardhurave pasive - paratë që fitohen pa punë aktive, si të ardhurat nga qiraja, dividendët nga investimet apo fitimi nga një biznes dytësor.
Bukuria e të ardhurave pasive është se mund të sigurojnë të ardhura të qëndrueshme edhe kur nuk punoni: kur flini, kur jeni me pushime ose edhe gjatë pensionit. Siç thotë autori financiar Robert T. Kiyosaki: “Të pasurit nuk punojnë për para, paratë punojnë për ta… ndërsa të varfrit punojnë për para”
7. Vlerësojnë paratë, por harrojnë burimin më të çmuar
Në fund, por jo më pak e rëndësishme: njerëzit më të suksesshëm e kuptojnë se burimi më i vlefshëm nuk është paraja, por koha. Paraja mund të fitohet, të kursehet e të investohet, por koha mund të shpenzohet vetëm një herë. Kur kalon, nuk kthehet më. Shumë njerëz punëtorë janë aq të përqendruar te fitimi, sa harrojnë të vlerësojnë kohën e tyre.
Mësoni ta respektoni kohën, përdoreni me mençuri dhe mbani mend se ajo është ndonjëherë investimi më i mirë që mund të bëni, në vetvete dhe në momentet që kanë vërtet rëndësi. /Telegrafi/