Conor McGregor është liruar nga burgu pas arrestimit në Miami, ndërsa e ka thyer heshtjen përmes një publikimi në rrjetet sociale.
Ish-kampioni i UFC-së ishte arrestuar të hënën mbrëma për shkak se ia theu telefonin një fansi, i cili ishte përpjekur ta fotografonte.
Ngjarja ka ndodhur jashtë një hoteli në Miami, ndërsa pasi e kishte thyer telefonin, irlandezi e kishte marrë me vete.
Për këtë arsye, ai është arrestuar dhe është dashur të paguajë garanci në mënyrë që të mbrohej në liri. Pas daljes nga burgu, 30-vjeçari nuk ka thënë asnjë fjalë për gazetarët, ndërsa më vonë i ka shfrytëzuar rrjetet sociale për të komunikuar me fansat e tij.
"Durimi në këtë botë është një virtyt, të cilin po vazhdoj ta përmirësoj. I dua me zemër fansat e mi. Faleminderit të gjithëve", ka shkruar McGregor në Instagram, ndërsa postimin e ka shoqëruar me një fotografi të tij. /Telegrafi/