Mediumet angleze raportojnë se Manchester United është gati të paguajë klauzolën prej 28 milionë eurosh për sulmuesin e Napolit, Dries Mertens.
30-vjeçari ka befasuar të gjithë me potencialin e tij të treguar në sulm pas largimit të Gonzalo Higuainit nga Napoli tek Juventusi.
Kjo formë e lartë e treguar dhe golat e shumtë të shënuar kanë bërë që skuadrat e mëdha të vihen pas tij, ku më i interesuari është Unitedi.
Mertens tashmë kombinon shumë mirë me shokun e tij te kombëtarja e Belgjikës, Romelu Lukaku dhe mund ta rikrijojë atë partneritet edhe në Old Trafford.
Sipas të përditshmes The Sun dhe Daily Express, Jose Mourinho e do Mertensin dhe mund të kemi një transferim të tij gjatë afatit kalimtar të verës.
Ekziston një klauzolë lirimi në kontratën e tij, e vlefshme vetëm për klubet jashtë Italisë, me vlerë 28 milionë euro (rreth 25 milionë funte).
Belgu kishte rezistuar të largohej më herët, pasi donte të vazhdonte të luante si një qendërsulmues se sa në rolin e tij të mëparshëm si një sulmues krahu.
Mertens u shndërrua në një sulmues shumë efektiv nga trajneri Maurizio Sarri në 2016, duke shënuar 45 gola në dy sezonet e fundit të Serie A. /Telegrafi/