Futbollisti legjendar holandez, 52-vjeçari Edgar Davids u përball me një situatë të pabesueshme sepse u grabit nga ish-e dashura e tij Nabili Habiby.
Habiby jetoi me Davids për një kohë në vitin 2014, kur holandezi u zhvendos në Londër, dhe i besoi asaj koleksionin e tij të pikturave me vlerë 220,000 euro.
Davids i futi pikturat në një kasafortë dhe ishte i sigurt se ato ishin ruajtur në mënyrë të sigurt, dhe vetëm vite më vonë e kuptoi se Habiby i kishte vjedhur ato.
Detajet e vjedhjes kanë dalë në dritë vetëm së fundmi, ndërsa gjyqi i 38-vjeçares Habiba, e cila vodhi 37 kopje të pikturave, është duke u zhvilluar aktualisht. Ajo i la ato peng në dyqane të ndryshme si kolateral, duke siguruar kredi me një total prej gati 30,000 eurosh.
E vërteta doli në dritë kur Habiby nuk mund t’i paguante më normat e interesit për ato kredi dhe gjatë gjyqit aktual ajo rrëfeu gabimet e saj.
"Ai i besonte asaj, por ajo e grabiti", tha prokurori Mark Seymour në fillim të gjyqit.
Habiby prej kohësh pretendonte se nuk kishte të bënte fare me vjedhjen, por në fund e rrëfeu. Kur u pyet për motivin e vjedhjes, ajo u përgjigj se si konsulente e pavarur, fitonte "vetëm" 6,000 euro në muaj.
Meqë ra fjala, ky nuk ishte krimi i saj i parë. Më parë ajo kishte mashtruar një mik duke përdorur kartën e tij bankare për të paguar qiranë e disa muajve për apartamentin e saj. Si rezultat, burri humbi 3,500 euro.
Davids është pensionuar nga futbolli që nga viti 2014, kur i tha lamtumirë ekipit anglez të ligës së ulët Barnet. Ai më parë ka luajtur për Ajax, Tottenham, Inter, Juventus, Barcelonë dhe Milan. Ai luajti 74 ndeshje për ekipin kombëtar holandez.
Gjatë karrierës së tij, ai fitoi Ligën e Kampionëve me Ajaxin në vitin 1995, fitoi Serie A tre herë me Juventusin dhe ishte gjithashtu kampion holandez tre herë me Ajaxin. /Telegrafi/