Thiago Motta e pranoi se Juventus kishte një "energji të ndryshme" në pjesën e dytë kundër Interit dhe e meritoi fitoren.
Pavarësisht se Interi kishte një javë të plotë për t'u përgatitur, Juventusi u tregua më i mprehtë.
“Në pjesën e dytë patëm një energji të ndryshme. E para ishte e vështirë, por në pjesën e dytë u treguam më të fortë dhe e merituam fitoren”, deklaroi Motta fillimisht për DAZN.
Ndeshja u vendos në minutën e 74-të, kur Randal Kolo Muani bëri një lëvizje të shkëlqyeshme, dhe Francisco Conceicao shënoi me një goditje të saktë.
“Lojtarët janë të rinj dhe kanë cilësi. Khephren Thuram luajti shumë mirë, por kishte ngërç, kështu që Manuel Locatelli hyri dhe kontribuoi”.
“Fitoret ndihmojnë në vetëbesim. Nuk e merituam fitoren në pjesën e parë, por e merituam në të dytën”.
“Nuk e bëj punën time për të kënaqur dikë, por për të përmirësuar ekipin. Djemtë meritojnë mbështetjen e tifozëve, sepse punojnë shumë për Juventusin”, përfundoi Motta.
Ky rezultat e çon Juventusin në vendin e katërt me 46 pikë, pesë pas Atalantës dhe tetë pas Interit. /Telegrafi/