Ja çfarë bëri Blerim Mazreku për hir të Allahut (Foto)

Sponsorët janë faktorë mjaft të rëndësishëm për klubet sportive në Kosovë. Madje, ata konsiderohen si shpëtim për sportin kosovar. Mirëpo, disa prej sponsorëve janë “non-grata” për një pjesë të sportistëve.

Për shembull, tek Sigal Prishtina, Blerim Mazreku dhe Muhamet Hasani njihen si basketbollistët që i përkushtohen më së shumti fesë Islame, duke i kryer të gjitha obligimet që ua përcakton ajo, raporton "Zëri". Dhe, vendosja e logos “Birra Peja” dhe “Pilsner”, nuk është pritur aspak mirë nga ta, pasi sipas fesë Islame, alkooli është i ndaluar dhe ekspozimi i tij përmes fanellës, i vë në siklet sportistët fetarë.

Për këtë, qendra kosovare e ka menduar një ide të mirë. Ai e ka mbuluar me një ngjitës të bardhë hapësirën ku shkruan “Birra” dhe “Pilsner”, duke e lënë të shihet vetëm “Peja”, duke shprehur në këtë mënyrë, megjithatë, respekt për këtë kompani që e ndihmon basketbollin.

Mbulimi i fanellave nuk ka ndodhur vetëm në Kosovë. Edhe në futbollin evropian ndodh kur futbollistët myslimanë kohë pas kohe e mbulojnë një pjesë të fanellës, e cila përmban emrin e ndonjë pijeje alkoolike apo ndonjë simbol tjetër, në kundërshtim me fenë Islame.

Miftari: S’kemi diskutuar asnjëherë për këtë punë

Kryesia e Sigal Prishtinës nuk është në dijeni rreth mbulimit të dy prej sponsorëve në fanellë, nga ana e ish-basketbollistit të Pejës. Drejtori i përgjithshëm i klubit, Florian Miftari, thotë se fanellat duhet të qëndrojnë të paprekshme, pasi sponsorët janë krahu i djathtë i klubit kampion të Kosovës.

“Nuk e kemi diskutuar asnjëherë këtë temë. S’ka çka aty, fanellat janë të paprekshme”, deklaroi shkurt Miftari për “Zërin”. /Telegrafi/