Italia mposht Turqinë në finalen e çmendur - shpallet kampione e botës
Italia ka kurorëzuar gjeneratën e saj të artë në volejboll për femra me fitimin e Kampionatit Botëror të 2025 në Tajlandë, duke mposhtur Turqinë 3-2 (25-23, 13-25, 26-24, 19-25, 15-8) në finalen e zhvilluar në “Huamark Indoor Stadium” në Bangkok. Ky është rikthimi i Italisë në majën e podiumit pas 23 vitesh.
Ky triumf shënon trofeun e katërt madhor për Italinë brenda 15 muajve, pas fitoreve në Ligën e Kombeve dhe Lojërat Olimpike në Paris 2024, si dhe suksesit të fundit në VNL.
Me këtë fitore, Italia mbetet e pamposhtur në 36 ndeshjet e fundit dhe bëhet kombëtarja e parë që mban njëkohësisht titujt olimpik dhe botëror që nga Kuba në 2002.
Në historikun e saj botëror, kjo është medalja e katërt për Italinë: titulli i parë në 2002, argjendi në 2018 dhe bronzi në 2022.
Trajneri Julio Velasco e përshkroi fitore si një moment emocional. “Pas Botërorit, Olimpiadës dhe dy VNL, kjo skuadër do të mbahet mend si legjendare. Janë munduar shumë në dy ndeshjet e fundit dhe japin maksimumin çdo ditë në stërvitje”, deklaroi ai.
Sulmuesja Paola Egonu udhëhoqi ekipin me 22 pikë (18 goditje, tre bllokime, një as), duke rikuperuar pas një gjysmëfinale të vështirë kundër Brazilit.
“Jam jashtëzakonisht krenare për ekipin dhe shumë e lumtur”, deklaroi Egonu pas finales.
Myriam Sylla shtoi 19 pikë (14 goditje, katër bllokime, një as), ndërsa Ekaterina Antropova kontribuoi me 14 pikë nga stoli, shumë prej tyre në momente kyçe.
Për Turqinë, ylli Melissa Vargas shënoi 33 pikë (28 goditje, katër asa, një bllokim), ndërsa kapitenia Eda Erdem realizoi 19 pikë (15 goditje, tre bllokime, një as).
Italia dominoi në bllokime (14-10), ndërsa Turqia kishte epërsi në goditje (68-59) dhe asa (7-5). Të dy ekipet gabuan nga 20 herë, por në fund Italia triumfoi në “tie-break” dhe rrëmbeu titullin e katërt madhor brenda 15 muajve. /Telegrafi/