Albin Tahiri i lumtur me suksesin në Lojërat Olimpike Dimërore “Pekini 2022”

Skitari i Kosovës, Albin Tahiri ka folur për suksesin e tij pas dy garave të sotme (e diel) të zhvilluara në Lojërat Olimpike Dimërore “Pekini 2022”, ku nuk munguan sukseset.

Tahiri është renditur i 37-ti nga 87 garues në garën e parë të sllallomit të madh duke përfunduar garën me kohë 1 minutë e 32.41 sekonda.

Përfaqësuesi i Kosovës ka përfunduar në mesin e 30 më të mirëve nga 89 garues në disiplinën e sllallomit të madh në garën e dytë, duke arritur synimin e tij të madh.

Lexo po ashtu Albin Tahiri zë vendin e 30-të në garën e dytë të sllallomit të madh

Ky sukses e ka bërë të lumtur Tahiri, i cili e ka treguar gjatë një interviste për faqen zyrtare të Komitetit Olimpik të Kosovës (KOK).

“Jam i lumtur që hyra sërish në top 30, sidomos pasi u lëshova i 73-ti në një shteg tejet të vështirë”, ka thënë fillimisht Albin Tahiri për faqen zyrtare të KOK-ut, pas garës në sllallom të madh.

“Po ndihem shumë mirë. Gara ishte shumë e vështirë për shkak të kohës. U mundova shumë të qëndrojë në shteg”.

“Në lëshimin e parë bëra një gabim të madh, por mbërrita në fund, ndërsa në të dytën u ndjeva shumë mirë”.

“Ishte shumë vështirë, por të jem në top 30, jam vërtetë shumë i lumtur për këtë”, përfundoi skitari i Kosovës. /Telegrafi/