Al-Khelaifi: Neymar dhe Mbappe nuk kanë asnjë arsye të largohen

Presidenti i Paris Saint-Germain, Nasser Al-Khelaifi shpreson që gara e klubit në Ligën e Kampionëve do të jetë e mjaftueshme për të bindur Kylian Mbappe dhe Neymar të qëndrojnë në Parc des Princes.

Kampionët francezë rezervuan vendin e tyre në gjysmëfinale të martën në mbrëmje ndërsa eliminuan Bayern Munichun për të marrë hak për humbjen në finale të sezonit të kaluar.

Presidenti i PSG-së, Al-Khelaifi shtoi besimin e tij se as Neymar dhe as Kylian Mbappe nuk kanë ndonjë arsye për të lënë klubin pas këtyre sukseseve.

Lexo po ashtu 'Rinovimi im nuk është më një problem' - Neymar konfirmon se ai do të nënshkruajë marrëveshje të re me PSG-në

“Ne kemi investuar shumë në klub për të fituar Ligën e Kampionëve dhe të gjithë trofetë në dispozicion”, ka thënë fillimisht Al-Khelaifi për RMC Sport.

“Neymar dhe Kylian nuk kanë asnjë justifikim për t’u larguar. Ne me të vërtetë kemi gjithçka për të fituar të gjitha garat”.

“Ne kemi një ekip të shkëlqyeshëm sot. Kemi respekt për të tjerët, por jemi aty me ta. Ne jemi duke punuar”.

“Dhe nuk ka mbaruar. Ne duhet të vazhdojmë, të qëndrojmë të qetë sepse Liga e Kampionëve nuk ka mbaruar. Ne duhet të punojmë më shumë çdo ditë”.

“Besimi është aty. Sekreti është puna. Detajet gjithashtu bëjnë ndryshimin”, përfundoi presidenti i PSG-së. /Telegrafi/