Aksion i gjerë në Tiranë, Policia Rrugore pezullon 46 leje drejtimi dhe bllokon 39 targa

Policia Rrugore e Tiranës ka publikuar pamjet e përmbylljes së një aksioni të gjerë në rrugët e kryeqytetit në 24 orët e fundit.

Sipas njoftimit të policisë, janë ndaluar 4 raste për tentativë për korruptim të efektivëve të policisë nga ana e drejtuesve të automjeteve, me qëllim shmangien e masës administrative për shkeljet e konstatuara.

“Brenda javës shkon në 9 numri i rasteve të goditura nga Policia Rrugore e Tiranës, për tentativë për të korruptuar punonjësit e Policisë Rrugore”, ka shtuar Policia.

Më tej, Policia ka njoftuar se ka bllokuar 39 targa të huaja dhe shqiptare përgjatë 48 orëve të fundit, si pjesë e një aksioni për kontrollet intensive për bllokimin e automjeteve që qarkullojnë me targa të huaja që u ka përfunduar afati apo që nuk i përkasin të njëjtit mjet.

Për më tepër, policia ka bllokuar 8 automjete luksi me targa të huaja, të cilat i kanë kaluar strukturave të tjera policore, për verifikime të mëtejshme.

Ndërkohë, policia ka njoftuar se vijojnë kontrollet e dedikuara për gjetjen, kapjen dhe ndëshkimin e drejtuesve që kryejnë parakalime të gabuara, gara shpejtësie e shpejtësi mbi normat e lejuara.

Policia ka vendosur 105 masa administrative për parakalime të gabuara, ka ndëshkuar 12 drejtues mjetesh për gara shpejtësie, ka pezulluar 46 leje drejtimi për shpejtësi tej normave të lejuara si dhe janë vendosur 234 masa administrative po për shpejtësi tej normave të lejuara. /Telegrafi/