Abdixhiku: Në këtë festë duhet t’i kujtojmë themelet e shtetit, që janë sa të dhimbshme aq edhe të lavdishme

Në 14 vjetorin e shpalljes së Pavarësisë, kryetari i Lidhjes Demokratike të Kosovës, Lumir Abdixhiku së bashku me anëtarë të Kryesisë kanë bërë homazhe te varri i ish-presidentit Ibrahim Rugova.

Abdixhiku para mediave ka deklaruar se sot nderojmë të gjitha gjeneratat që e kanë bërë të mundur festën e 17 shkurtit.

“Në 14 vjetorin e ditëlindjes së shtetit të Kosovës në ditën më të rëndësishme për vendin tonë nderojmë të gjitha gjeneratat që për kohë te gjatë kanë bërë të mundur që të kemi festë me 17 shkurt. Nderojmë intelektualët e viteve 90-ta me presidentin historik Ibrahim Rugova siç nderojmë familjen Jashari dhe aleatët tanë që na qëndruan pranë. Në këtë festë do të kujtojmë themelet e shtetit tonë që janë sa të dhimbshme aq edhe të lavdishme”, ka pohuar Abdixhiku.

Ndryshe, sot më 17 shkurt, bëhen 14 vjet që kur Kosova u shpallë shtet i pavarur, sovran dhe demokratik. Pavarësia e Kosovës u shpallë nga deputetët e Kuvendit të Kosovës, në një mbledhje të jashtëzakonshme, ku të pranishëm në sallë në atë kohë ishin 109 deputetë.

Shpallja e pavarësisë u bë rreth orës 15:39, ndërkohë në të gjitha qytetet e Kosovës ishin bërë organizime të shumta, e qytetarët me gëzim të madh festuan ditën e pavarësisë.

Manifestimi kryesor për shpalljen e pavarësisë ishte bërë në kryeqytetin e Kosovës, ku qytetarët nga të gjitha komunat ishin nisur drejt shesheve të Prishtinës.

Pavarësia e Kosovës është njohur nga 117 shtete, ku shteti i fundit i cili ka njohur pavarësinë e Kosovës ishte Izraeli. /Telegrafi/