AAK, ministrave të Qeverisë Kurti: Nuk jeni prokurorë, do të përgjigjeni për propagandën tuaj

Zëdhënësi i AAK-së, Lulëzim Blaka, ka deklaruar se ministrat e Kurtit po e luajnë rolin e prokurorëve me zhurmë e propaganda në publik, në tentim të persekutimit të opozitës.

Blaka përmes një postimi në Facebook ka shkruar se: “Çka është puna e këtyre ministrave të Albinit? A janë prokurorë apo çka është puna e tyre?”.

“Sikur ata të jenë ministra hakikat, nuk bëjnë zhurmë e propagandë në publik, por i dërgojnë pretendimet e dyshimet, nëse i kanë, në Prokurori. Pse kanë nevojë këta mashtrues të merren me çështje të cilat janë prerogativë ekskluzive e organit të akuzës? ”, ka shkruar Blaka.

Lexo po ashtu Dyshimet për keqpërdorime në shpronësimet e rrugës Kijevë-Zahaq, deklarohet ministri Aliu

Blaka ka bërë të ditur se këto shpifje nuk do të kalojnë lehtë, sepse ata do të përgjigjen një nga një për siç tha ai “rrenat e tyre publike”.

“Apo veç kujtojnë se me shpifje e me gënjeshtra publike kanë arritur qëllimin? Jo, kjo nuk do të kalojë dhe do të përgjigjen një për një për krejt rrenat publike!”, ka shkruar Blaka.

Në fund ai ka tërhequr vërejtjen dhe iu është drejtuar ministrave të Kurtit se “Nuk mund ta tërhiqni vëmendjen e opinionit për dështimet e juaja me asnjë rrenë, sado e madhe qoftë ajo!”. /Telegrafi/