Dell heq politikën e punës hibride dhe në distancë, kërkon kthimin në zyrë me orar të plotë

Duke filluar nga 3 marsi, punonjësit e Dell do të duhet të jenë fizikisht në zyrë pesë ditë në javë, duke shënuar fundin e politikës hibride dhe të punës në distancë të kompanisë.

Sipas një emaili të siguruar nga Business Insider, CEO i Dell, Michael Dell, shkruan:

“Të gjithë anëtarët e ekipeve hibride dhe ata që punojnë në distancë, të cilët jetojnë pranë një zyre të Dell, do të punojnë në zyrë pesë ditë në javë. Politika hibride do të hiqet përfundimisht që nga ajo ditë”.

Ai argumenton se asnjë teknologji nuk mund të zëvendësojë ndërveprimin e drejtpërdrejtë midis njerëzve:

“Ajo që kemi kuptuar është se, pavarësisht gjithë teknologjisë në botë, asgjë nuk është më e shpejtë se shpejtësia e ndërveprimit njerëzor. Një bisedë 30-sekondëshe mund të zëvendësojë një shkëmbim emailesh që mund të zgjasë me orë ose edhe ditë”, shkruan Dell.

Dell ende promovon zgjidhjet për punën në distancë

Pavarësisht këtij urdhri për kthim në zyrë, Dell vazhdon të shesë zgjidhje për punën në distancë, duke pranuar përfitimet që ajo sjell: “Fleksibilitet, ulje të kohës së udhëtimit dhe kursim kostosh për punonjësit, ndërsa për punëdhënësit ofron akses në një bazë më të gjerë talentesh, ulje të shpenzimeve operative dhe rritje të produktivitetit”.

Kthimi në zyrë zbatohet globalisht, por me disa përjashtime

Në fakt, Dell kishte kërkuar tashmë që ekipet e shitjeve, prodhimit dhe inxhinierisë laboratorike të ktheheshin në zyrë, shkruan the Verge.

Në email, kompania përmend “shpejtësinë, energjinë dhe pasionin e rikthyer” të këtyre ekipeve si arsye për ta zbatuar politikën globalisht.

Megjithatë, punonjësit që kanë punuar në distancë dhe nuk jetojnë pranë një zyre të Dell mund të vazhdojnë të punojnë nga shtëpia.

Dell nuk është e vetmja kompani që kërkon rikthimin në zyrë

Në muajt e fundit, disa kompani të mëdha kanë zbatuar masa të ngjashme për kthimin në zyrë, përfshirë AT&T, Amazon, Stellantis dhe JP Morgan, të cilat kanë filluar ose shpallur politika të reja të punës në zyrë këtë muaj.

Ndërkohë, presidenti amerikan Donald Trump nënshkroi javën e kaluar një urdhër ekzekutiv që kërkon kthimin e të gjithë punonjësve federalë në zyrë, duke kërkuar që të gjitha departamentet qeveritare të ndërpresin marrëveshjet për punën në distancë. /Telegrafi/