Super heronjtë do të lëshohen në Klinikën e Pediatrisë në QKUK për të mbështetur pacientët e vegjël

Edhe këtë vit do të zhvillohet aktiviteti tradicional i alpinizmit urban në ndërtesën e Pediatrisë në Qendrën Klinike Universitare të Kosovës (QKUK) nën organizimin e Klubit Alpin Prishtina dhe Care for Kosovo Kids.

Në një njoftim të publikuar në rrjetin social në Facebook bëhet e ditur se ky aktivitet ka për qëllim të rrisë ndërgjegjësimin dhe të mbledhë fonde për nevojat specifike të pacientëve të vegjël në onkologji, duke ofruar një mundësi për të kontribuar në përmirësimin e kushteve të trajtimit të fëmijëve të prekur nga kanceri.

Tutje në njoftim bëhet e ditur se alpinistët e KAP të maskuar si super heronjtë e kohëve moderne me lëshime alpine do të ofrojnë gëzim, dhurata dhe befasi për të vegjlit nëpër katet e pediatrisë, gjithnjë nën mbikëqyrjen e stafit mjekësor të klinikës.

“Këto akte me dedikim dhe kauzë janë mënyra jonë e shfaqjes së falënderimit, përkrahjes dhe mirëkuptimit për stafin mjekësor të vendit tonë, për prindërit dhe fëmijët, për stafin e Care for Kosovo Kids dhe dhuruesit e shumtë të mjeteve. Përveç kësaj, është rritje e përgjegjësisë sociale dhe forcim i lidhjeve njerëzore të cilat nuk kanë çmim dhe krijojnë ndjenjën e përkatësisë dhe humanitetit në mes nesh”, thuhet në njoftim.

Ndërkaq, kjo ngjarje do të mbahet të premten më 13 dhjetor, nga ora 11:00 në oborrin e Pediatrisë në QKUK.

Ndryshe, kjo ngjarje zhvillohet me ndihmën e Ministrisë së Shëndetësisë, Komunës së Prishtinës, Menaxhmentit të QKUK, Bankës Ekonomike si dhe me partnerë e përkrahës të tjerë të cilët në çdo mënyrë e përkrahin aktivitetin dhe dhurojnë mjete për fondin në fjalë. /Telegrafi/