Wan-Bissaka refuzon West Hamin, pasi kërkon kalimin te gjiganti italian pas një viti si lojtar i lirë

Aaron Wan-Bissaka raportohet se ka refuzuar një transferim në West Ham dhe mund të largohet nga Manchester United si transferim i lirë në vitin 2025.

Mbrojtësi i djathtë 26-vjeçar, i cili u transferua nga Crystal Palace për 50 milionë funte në vitin 2019, po shqyrton me kujdes opsionet e tij të së ardhmes.

Ai ka refuzuar një lëvizje në Londër dhe ekziston gjithashtu një mundësi që ai mund të kalojë vitin e fundit të kontratës së tij me klubin aktual për t’u bërë lojtar i lirë verën e ardhshme, duke tërhequr potencialisht oferta më fitimprurëse, shkruan The Telegraph.

Disa klube, duke përfshirë Galatasaray dhe Inter, kanë treguar interes për Wan-Bissaka dhe mbrojtësi thuhet se është i hapur për një lëvizje te gjigantët e Serie A.

Ka pasur diskutime mes ndërmjetësve për një marrëveshje të mundshme shkëmbimi që përfshin mbrojtësin e djathtë holandez të Interit, Denzel Dumfries, por nuk ka asgjë konkrete për momentin.

Sidoqoftë, perspektiva për t’u transferuar te gjigantët e Serisë A mund të jetë tërheqëse për Wan-Bissaka, duke i ofruar atij një sfidë të re dhe mundësinë për të ringjallur karrierën e tij në Itali. /Telegrafi/