Raporti i Borrellit, Bislimi: Kam informacione se do të rekomandohet heqja e masave ndaj Kosovës

Zëvendëskryeministri i vendit, Besnik Bislimi ka folur sot në Komisionin për Integrime Evropiane lidhur me largimin e masave ndaj Kosovës.

Ai para deputetëve tha se me aq është në dijeni raporti i Josep Borrellit do të jetë pozitiv dhe do të rekomandohet heqja e masave.

“…Besojmë se do të dërgohet për aprovim në Këshill gjatë javës së ardhshme. Përmbajtja e raportit me aq sa e di unë është pozitive dhe aty do të rekomandohet heqja e masave”, është shprehur Bislimi, raporton Telegrafi.

Lexo po ashtu Qeveria në pritje të raportit të BE-së për heqjen e masave: Borrell të konstatojë përmbushjen e kushteve

Ai tha tutje se të gjitha veprimet që janë kërkuar nga Kosova janë plotësuar.

Ndryshe, Bislimi gjatë paraqitjes së tij para deputetëve tha se janë katër lloje të masave të BE-së ndaj Kosovës, të cilat sipas tij bazën ligjore e kanë shumë diskutabile.

Ai bëri të ditur se ndër masat janë pezullimi i punës së trupave të zbatimit të Marrëveshjes së Stabilizim-Asocimit, është suspenduar puna në miratimin apo aprovimin e fondeve për IPA 2024.

Bislimi po ashtu tha se janë pezulluar aprovimet e reja për projekte, saktësisht aplikimet për kornizën investive të Ballkanit Perëndimor.

I dyti i Qeverisë po ashtu u shpreh para deputetëve se thënë se Kosova nuk do të ftohet në takimet e nivelit të lartë dhe nuk do të ketë vizita bilaterale.

“Mundeni me analizu se në ç’masë janë respektuar këto masa…. ka pasur takime të nivelit të lartë bilateral e multi-leteral…. Për dijeninë tuaj nuk është pezulluar asnjë projekt i BE-së që ka qenë duke u zbatuar”, tha ai.

Sipas tij, ajo që ka ndodh është se projektet IPA që është dashur të kontraktohen nga fillimi, kontaktraktimi i tyre është shtyrë deri në heqjen e masave. /Telegrafi/