Weber: OBRM-PDUKM në vazhdimësi duhet të përdorë emrin kushtetues Maqedonia e Veriut

Manfred Weber, lider i grupit të partive Popullore në Parlamentin Evropian (EPP), kërkoi nga OBRM-PDUKM që të përdorë emrin kushtetues të shtetit të Republikës së Maqedonisë së Veriut. Këtë e ka theksuar Weber përmes një postimi në rrjetin social “X”.

“Udhëheqja e OBRM-PDUKM-së duhet të respektojë plotësisht dispozitat detyruese të Marrëveshjes së Prespës dhe të përdorë në vazhdimësi emrin “Maqedonia e Veriut”. Respektimi i marrëveshjeve ndërkombëtare është një parakusht bazë për ne si PPE. Përndryshe, Evropa nuk mund të funksionojë dhe BE-ja nuk do ta pranojë këtë”, thuhet në postimin e Weber.

OBRM-PDUKM është anëtare e Partisë Popullore Evropiane. EPP është grupi politik më i madh dhe më me ndikim në Bashkimin Evropian dhe pothuajse të gjitha partitë kristiandemokrate nga vendet anëtare të BE-së dhe vendet kandidate janë anëtarë të saj.

Në mars të këtij viti, partia e Hristijan Mickoskit mori pjesë në kongresin e PPE-së që u mbajt në Bukuresht.

The @VMRO_DPMNE leadership should fully respect the binding Prespa Agreement provisions & consistently use the name “North Macedonia.” Respecting international agreements is a fundamental prerequisite for us as @EPP. Otherwise Europe can not function & the EU will not accept this

— Manfred Weber (@ManfredWeber) May 23, 2024