Franca do të dërgojë ndihmë ushtarake shtesë në Ukrainë së shpejti, thotë Elysee

Franca do t’i japë Ukrainës ndihma shtesë ushtarake në ditët dhe javët e ardhshme.

Kjo është bërë e ditur nga Elysee të martën, pasi presidenti Emmanuel Macron foli me telefon me presidentin ukrainas Volodymyr Zelensky, shkruajnë mediat e huaja, përcjell Telegrafi.

“Presidenti i Republikës përsëriti vendosmërinë e Francës për të ofruar të gjithë mbështetjen e nevojshme… Ai ishte gjithashtu në gjendje të detajonte dërgesat për ditët dhe javët e ardhshme në mbështetje të përpjekjeve ushtarake ukrainase”, thuhet në një deklaratë.

Një zyrtar i Elysee nuk pranoi të shtjellojë se çfarë mund të përfshijnë dërgesat.

Në bisedën e tij me Zelensky, Macron theksoi mbështetjen e tij për një armëpushim gjatë Lojërave Olimpike në Paris këtë verë, thuhet në deklaratë, e cila do të përfshinte ndërprerjen e operacioneve të Rusisë dhe marrjen e “të gjitha iniciativave të dobishme diplomatike” për hapjen e negociatave.

Javën e kaluar, presidenti i Kinës, Xi Jingping mbështeti thirrjen për një armëpushim global gjatë Olimpiadës së Parisit.

Kujtojmë se së fundmi, trupat ukrainase mbeten të angazhuara fuqishëm ndaj forcave ruse.

Në këtë drejtim, kreu i forcës policore të Ukrainës në rajonin e Kharkiv e ka përshkruar situatën në qytetin Vovchansk si “jashtëzakonisht të vështirë”.

Ndërsa Oleksiy Kharkivskiy, shefi i policisë patrulluese të Vovchansk, tha në Facebook se forcat ruse po vendosin pozicione brenda qytetit.

Këto lëvizje janë pjesë e “ofensivës urgjente” të Moskës në rajonin e Kharkiv, e cila po e detyron Ukrainën të nxitojë me përforcime. /Telegrafi/