Lajme Kosovë

Ndërmarrja Trepça jep detaje për incidentin ku u lënduan 12 minatorë

Para 12 muajve

Të mërkurën, 13 minatorë të kombinatit metalurgjik Trepça kanë pësuar lëndime gjatë transportimit të acidit sulfurik në ambientet e punës.

Kompania Minierare Trepça, përmes një njoftimi në Facebook, tha se incidenti ka ndodhur në horizontin e njëmbëdhjetë të minierës së Stantërgut në Mitrovicë të Jugut.

“Gjatë operacioneve të mirëmbajtjes dhe pastrimit të sistemit të pompave me acid sulfurik këtë të mërkurë, më 17 Janar 2024, rreth orës 12:35 pasdite, në nivelin e XI të minierës së Stantërgut, ndodhi një rrjedhje e acidit nga një bombolë. Incidenti rezultoi në lëndimin e dymbëdhjetë minatorëve, të cilët menjëherë morën ndihmë mjekësore të parë dhe më pas u transportuan në Spitalin Rajonal të Mitrovicës për trajtime të mëtejshme”, njoftoi Trepça.

Tutje thotë se ekipet e intervenimit të Trepçës, nën drejtimin e Njësisë Biznesore, mobilizuan me efikasitet për të siguruar evakuimin e personelit të lënduar dhe ofruan ndihmë të parë, duke i çuar ata në kujdesin e profisionistëve mjekësor.

“Kemi informacion nga ekipi mjekësor se gjendja e punëtorëve të plagosur është duke u përmirësuar, me tetë prej tyre që kanë marë lëndime relativisht të lehta dhe janë nën trajtimin mjekësor emergjent, ndërsa dy të tjerë janë duke u trajtuar për lëndime më serioze por të mjekueshme në departamentin e oftalmologjisë,” shtoi ndërmarrja.

Trepça, ndërkohë, iu ka uruar shërim të shpejtë dhe të plotë minatorëve të lënduar dhe shpreh keqardhjen më të thellë për ngjarjen e ndodhur.

“Bordi Mbikëqyrës, Drejtori Ekzekutiv dhe stafi i Njësisë Biznesore të Minierave të Stantërgut me Flotacion Tunel i Parë shprehin ndjenjat e tyre më të sinqerta të keqardhjes për aksidentin e ndodhur dhe dërgojnë dëshirat e tyre për një shërim të shpejtë për të gjithë punëtorët e prekur,” thuhet në fund.

Ndërkaq, ministri i Shëndetësisë, Arben Vitia, ka treguar për gjendjen shëndetësore të minatorëve të lënduar.

Ai ka thënë se minatorët e lënduar kanë marrë trajtim shëndetësor në Spitalin e Përgjithshëm “Dr. Sami Haxhibeqiri” në Mitrovicë.

“Njëmbëdhjetë nga ta, pasi morën trajtimin shëndetësor janë liruar nga spitali në gjendje të mirë shëndetësore. Ndërsa dy të tjerë të cilët kanë lëndime në sy, janë ende nën mbikëqyrje dhe kujdesin mjekësor të mjekëve dhe infermierëve. Ata nuk kanë rrezik për jetën”, ka shkruar ministri Vitia, në një postim në Facebook.

Vitia ka përgëzuar stafin shëndetësor të Spitalit të Mitrovicës që ishte në krye të detyrës dhe me profesionalizëm ofroi kujdesin shëndetësorë për minatorët e lënduar.

Kompleksi metalurgjik Trepça është shoqëri aksionare: 80 për qind e aksioneve janë të Qeverisë së Kosovës, 20 për qind janë të punonjësve të kësaj ndërmarrjeje./Telegrafi/