Tifozët e Celtic rrezikojnë sanksionet e UEFA-s pasi shfaqën flamujt e Palestinës

Tifozët e Celtic mbajtën lart flamujt e Palestinës përpara ndeshjes së tyre në Ligën e Kampionëve kundër Atletico Madridit të mërkurën mbrëma.

Ndeshja e cila përfundoi në barazim 2-2, pavarësisht se nikoqirët kaluan dy herë në avantazh, ishte dominuar nga grindjet e brendshme dhe të jashtme.

Mijëra tifozë të Celtic kundërshtuan udhëzimet e klubit përpara fillimit duke shfaqur flamujt e Palestinës, një veprim që ka të ngjarë të çojë në sanksione nga UEFA, e cila ka aplikuar më parë masa disiplinore kundër gjigantëve skocezë, duke përfshirë një gjobë prej dhjetë mijë eurosh në 2016 për shfaqjen e flamujve të Palestinës në një lojë kundër skuadrës izraelite Hapoel Be’er Sheva.

Rregulli 16.2 i UEFA-s thotë se klubet janë përgjegjëse për sjelljen e tifozëve dhe procedurat disiplinore mund të ndodhin nëse shfaqet një mesazh politik, me Barcelonën dhe Celtic të gjobitur më parë për shfaqjen e flamujve kombëtarë që UEFA konsideronte se kishin dërguar një mesazh politik.

Vendimi i Atleticos për të hequr dorë nga bluzat e tyre me vija dhe për të veshur një bluzë krejt të kuqe bazuar në atë të veshur nga skuadra që mundi Celtic në gjysmëfinalet e Kupës Evropiane të vitit 1974 hapi gjithashtu plagë të vjetra.

Brigada e Gjelbër, një grup ultra mbështetës në Celtic Park, kishte thënë më parë se do të shpërndante flamuj përpara ndeshjes, dhe grupi tashmë është ndaluar nga ndeshjet jashtë vendit pasi shfaqi të njëjtit flamuj në ndeshjet e tjera të fundit, ka raportuar BBC.

Flamujt u valëvitën edhe në zona të tjera të stadiumit që nuk janë të pushtuara nga Brigada e Gjelbër.

Përpara ndeshjes, klubi njoftoi se lojtarët dhe stafi do të mbanin shirita të zinj në krahë si një shfaqje respekti për të gjithë ata të prekur nga konflikti dhe do të jepnin një kontribut për kryqin e kuq.

Por, klubi kërkoi gjithashtu që “banderolat, flamujt dhe simbolet në lidhje me konfliktin dhe ato vende të përfshira në të të mos shfaqen në Celtic Park në këtë kohë”.

Brigada e Gjelbër beson se tifozët e futbollit kanë të drejtë të shprehin bindjet politike.

Klubi skocez gjithashtu mund të përballet me gjobë nga UEFA për veprimet e tyre të mërkurën mbrëma. /Telegrafi/