Irani thotë se ka lëshuar me sukses një raketë balistike me rreze 2000 kilometra – e aftë të arrijë bazat në rajon të operuara nga Izraeli dhe SHBA

Irani ka lëshuar me sukses një raketë balistike me rreze veprimi 2,000 km, sipas mediave shtetërore të vendit – dy ditë pasi shefi i forcave të armatosura të Izraelit ngriti mundësinë e “veprimit” kundër Teheranit lidhur me programin e tij bërthamor.

Me një nga programet më të mëdha të raketave në Lindjen e Mesme, Irani thotë se armët e tij janë të afta të arrijnë bazat në rajon të operuara nga Izraeli dhe SHBA, shkruan Sky News, përcjell Telegrafi.
Teherani ka thënë se do të zhvillojë më tej programin e tij të raketave “mbrojtëse”, pavarësisht kundërshtimit nga SHBA dhe vendet evropiane.

“Mesazhi ynë për armiqtë e Iranit është se ne do të mbrojmë vendin dhe arritjet e tij. Mesazhi ynë për miqtë tanë është se ne duam të ndihmojmë stabilitetin rajonal”, ka thënë Mohammad Reza Ashtiani, ministri i mbrojtjes i Iranit.

Ndërkohë pamjet e një versioni të përmirësuar të raketës balistike të Iranit Khorramshahr 4, me një rreze veprimi prej 1,243 milje (2,000 km) që mund të mbajë një kokë lufte 1,500 kg (3,300 lb), u transmetuan në TV shtetëror.

Agjencia shtetërore e lajmeve IRNA raportoi se raketa quhej Kheibar, që është një referencë për një kështjellë hebreje të pushtuar nga luftëtarët myslimanë në ditët e para të Islamit.

Izraeli, i cili nuk njihet nga Republika Islamike, e sheh Iranin si një kërcënim ekzistencial.

Irani pretendon se raketat balistike janë një parandalues i rëndësishëm, si dhe një forcë kundër SHBA-së, Izraelit dhe kundërshtarëve të tjerë të mundshëm rajonalë.

Në anën tjetër, të martën, gjenerali i lartë izraelit ngriti mundësinë e “veprimit” kundër Iranit pasi përpjekjet e gjashtë fuqive botërore për të ringjallur marrëveshjen bërthamore të Teheranit të vitit 2015 kanë ngecur që nga shtatori i kaluar mes frikës në rritje perëndimore për përparimet e përshpejtuara bërthamore të Teheranit.

Ndryshe, ish-presidenti amerikan Donald Trump u tërhoq nga marrëveshja bërthamore me Iranin në vitin 2018 dhe rivendosi sanksionet amerikane ndaj Iranit, duke e shtyrë Teheranin të shkelte disa nga kufizimet bërthamore të paktit në shenjë hakmarrjeje.

Ndërsa pasardhësi i tij, Joe Biden, u zotua të ribashkohet me marrëveshjen në të cilën Irani ra dakord të çmontojë pjesën më të madhe të programit të tij bërthamor dhe të hapë objektet e tij për inspektime më të gjera ndërkombëtare në këmbim të lehtësimit të sanksioneve. /Telegrafi/