Rrëfimi prekës i djalit nga Utah që e takoi nënën e tij biologjike pas 20 vitesh – ku e kuptoi se ata punojnë në të njëjtin spital

Një djalë i cili u birësua në lindje dhe nëna e tij biologjike kërkuan njëri-tjetrin për vite me radhë – dhe në fund zbuluan se nuk kishin qenë kurrë kaq larg.

Sipas mediave të huaja, përcjell Telegrafi, bëhet fjalë për Benjamin Hulleberg dhe Holly Shearer që zbuluan shpejt në takimin e tyre të parë se ata punonin në të njëjtin spital të Salt Lake City.

“Ishte e vështirë për t’u përshkruar”, tha Hulleberg për HuffPost përmes Facebook Messenger për takimin më në fund me nënën e tij biologjike.

Shearer është një asistente mjekësore në “HCA Healthcare’s St. Mark’s Hospital”. Hulleberg doli vullnetar në njësinë e kujdesit intensiv neonatal të spitalit.

“Çdo mëngjes, unë hyja përmes pavijonit të grave për të hyrë në punë”, tha Shearer për “Good Morning America” të martën. “Kështu që, kaloja pranë çdo ditë. Ne parkuam në të njëjtin garazh, mund të ishim në të njëjtin kat, nuk e kishim idenë se ishim kaq afër”.

Shearer ishte vetëm 15 vjeçe kur lindi djalin e saj.

Ajo filloi të kërkonte prindër birësues gjashtë muaj pas shtatzënisë nga frika se nuk mund të siguronte jetën që donte për fëmijën e saj.

Angela dhe Brian Hulleberg e adoptuan Benjaminin në ditën e lindjes së tij – Dita e Falënderimeve 2001.

Çifti ishte i hapur me Benjamin për birësimin e tij dhe bisedoi me të rregullisht për nënën e tij biologjike, të cilën ai e kishte njohur vetëm me emrin Holly.

“Ne e dinim që Holly e donte Benjaminin që nga dita që ajo na e dorëzoi atë”, tha Angela Hulleberg për kanalin e lajmeve të Salt Lake City, KSL. “Ajo e donte atë me gjithë zemër dhe shpirt”.

E Benjamin Hulleberg tha në një postim në Facebook në nëntor se ai gjithmonë kishte “një dëshirë të thellë për të takuar nënën” dhe e kishte kërkuar për vite me radhë, përcjell Telegrafi.

Madje ai “u kishte shkruar letra agjencive të birësimit të Utah, kishte bërë testin e ADN-së, ishte regjistruar në regjistrin e birësimeve”, shkroi ai në nëntor 2021. “Por asgjë”.

Ai nuk e dinte që Shearer e kishte gjetur tashmë në rrjetet sociale.

Ajo e kishte vëzhguar atë nga larg për vite me radhë përpara se të merrte vendimin në nëntor – dy ditë para ditëlindjes së 20-të të djalit të saj – dhe i dërgoi një mesazh në Facebook.

“Ju nuk më njihni mua”, kishte filluar Shearer mesazhin e saj. “20 vjet më parë mora vendimin më të vështirë të jetës sime dhe vendosa fëmijën tim të vogël të bukur për birësim në një familje të bukur”.

Shearer i tha në mesazhin e saj se ajo “nuk kishte ndërmend ta kthente jetën e tij përmbys”, por donte që ai të dinte se ajo “kishte menduar për të çdo ditë”.

“Më në fund pata guximin t’ju dërgoja një mesazh duke ju uruar ditëlindjen”, shkroi ajo.

Dhe sigurisht, Benjamin Hulleberg mbeti i shtangur.

“Më kujtohet saktësisht vendi ku isha kur mora mesazhin”, ka rrëfyer ai. “Unë isha në punë. Unë isha një operator makinerie dhe mbaj mend që isha në makinën nr. 15. Isha në mes të kontrolleve tona të cilësisë dhe mora telefonin tim dhe pashë mesazhin e saj dhe sapo iu përgjigja”.

Benjamin Hulleberg i tha Shearer se donte ta takonte menjëherë dhe ata planifikuan të darkonin me të dy familjet e tyre të nesërmen.

Më 21 nëntor 2021, të dy më në fund u ribashkuan.

“Nuk kam fjalë që mund të përshkruajnë ndjenjat që ndjeva duke takuar gruan që më lindi 20 vjet më parë”, shkroi Benjamin Hulleberg në Facebook. “Rrënjët e mia. ADN-ja ime. Unë kurrë nuk e kam pasur atë në jetën time”.

Gjatë takimit të tyre, Benjamin Hulleberg gjithashtu takoi dy “gjysmëvëllezërit” e tij dhe për çudi, zbuloi se ai dhe Shearer punonin në të njëjtin spital.

Pas kësaj, ai filloi të vizitonte Shearer ndërsa të dy ishin në punë.

“Të jem në gjendje të ulem me nënën time biologjike dhe të pi kafe dhe të flas para se të shkoj në turnin tim? Ka qenë e mrekullueshme”, tha ai.

Benjamin Hulleberg i tha HuffPost se të dy madje jetuan së bashku nga janari deri në prill, një përvojë që sipas tij ishte “e shkëlqyer”.

Ai tregoi se së shpejti do të shkojë në Logan, Utah, për shkollim të mëtejmë. /Telegrafi/