Bashkëshortja e kryeministrit izraelit, akuzohet për keqpërdorimin e buxhetit për nevoja familjare (Foto)

Sara Natanyahu është gruaja e kryeministrit izraelit Benjamin Natanyahu, që po akuzohet për keqpërdorim dhe shkelje të besimit, në lidhje me keqpërdorimin e supozuar të fondeve të rezidencës kryeministrore.

Në rastin e njohur si “Afera e Ushqimeve të Gatshme”, ajo po akuzohet se shfrytëzoi paratë shtetërore, për të paguar ushqimet e porositura që arrijnë vlerën e 85 mijë eurove, thuhet në aktakuzën e ngritur nga një gjykatë e lartë në Jerusalem.

Sipas CNN, Sara shfrytëzoi edhe dhjetëmijë euro tjera, që të paguajë një kuzhinier profesionist. Po që se shpallet fajtore, për këto shpenzime të bëra prej 2009 deri më 2013, rrezikon dënim deri në tetë vite burg.

Mbrojtësit e saj i kanë hedhur poshtë akuzat, duke thënë se janë “të rrejshme dhe haluçinuese”.

“Është hera e parë në Izrael dhe në botë, që gruaja e një udhëheqësi akuzohet për të hyra e ushqimit” ka thënë ekipi saj mbrojtës. “Nuk ka shkelje apo abuzim me ligjin, shkelje të besimi apo keqpërdorim mjetesh. Ushqimi nuk ishte për familjen Natanyahu por për të ftuarit e shumtë, përfshirë edhe punonjësit e rezidencës. Jemi të bindur se do të triumfojë drejtësia dhe logjika e shëndoshë” thuhet në reagimin e mbrojtësve.

Nën ligjet izraelite, rezidenca e kryeministrit mund të porositë ushqim të gatshëm, vetëm nëse nuk ka kuzhinier. Por, përkundër se ishte një, vazhdonin porositë për pjata të shtrenjta, në restorantet më luksoze në Jerusalem, teksa faturat shlyheshin nga paratë e taksapaguesve, thuhet në raportin e hetuesve.

Pos kësaj, Sara akuzohet se pagoi kamerier që t’i shërbejnë gjatë fundjavave, ndërsa paguheshin sikur të ishin “fuqi punëtore shtesë”, apo “pastrues”.

“Gjueti shtrigash” i ka cilësuar ajo akuzat, për shkak të pozitës së bashkëshortit të saj, ndërsa ka thënë se “nuk do të gjendet asgjë, sepse nuk ka asgjë të vërtetë”.

Në anën tjetër, kryeministri Netanyahu i ka hedhur poshtë akuzat, duke shtuar se nuk ka të bëjë me to dhe nuk do të dorëhiqet për asnjë moment. /Telegrafi/