3 vite nga protesta e gazetarëve për lirinë e Kezharovskit (Video)

Para tre vjetëve, më 23 tetor 2013, gazetarët u ndaluan që të protestojnë qetësisht para Muzeut të luftës maqedonase për shtetësi dhe pavarësi, por u ndaluan nga ana e forcave policore. Protestat ishin paralajmëruar para këtij objekti, por kur gazetarët filluan të tubohen, policia dhunshëm i shtyu drejt qendrës “Filipi Dytë”, dhe nuk i lejoi që të afrohen drejt objektit.
Me rastin e kësaj dite, përmes facebook ka reaguar edhe Tomislav Kezharovski, përcjell Telegrafi Maqedoni.

“Të nderuar kolegë, ju informojë se nesër, pasdite do të jem në qendrën Filipi i Dytë, tek muzeu i OBRM-së, atje ku ju ishit më 23 tetor 2013, ku protestuat për fajësimet që më bëheshin dhe kërkuat lirimin tim. Ju ftoj simbolikisht, të festojmë ditën kur policia ngriti dorë mbi gazetarët dhe u mundua t’i hesht ata”, shkruan Kezharovski.
Ai gjithashtu tha se askush nuk mund t’i bëjë ballë një njeriu mendjehapur.

Kezharovski u dënua me 4 vjet e gjysëm burg, për zbulimin e një dëshmitari të mbrojtur. Për lirimin e tij bënë thirrje një pjesë e madhe e organizatave joqeveritare të vendit dhe të huaja, që merren me lirinë e mediave dhe të drejtat e njeriut./Telegrafi/