Zëvendëspresidenti i PE-së ligjëron para studentëve të UP-së

Zëvendëspresidenti i Parlamentit Evropian, Rainer Wieland, ka vizituar rektoratin e Universitetit të Prishtinës “Hasan Prishtina”, ku është pritur në takim nga rektori i Universitetit të Prishtinës “Hasan Prishtina”, Marjan Dema.

Dema u shpreh i lumtur për vizitën që Wieland ia ka bërë Universitetit të Prishtinës.

Ai i informoi vizitorët për rëndësinë dhe progresin që ka shënuar UP-ja, ku theksoi që Universiteti i Prishtinës dhe rrugëtimi i tij janë storie suksesi.

“Ne kemi bërë progres në disa fusha por, mbi të gjitha, kemi krijuar standarde të aplikueshme në mënyrë të barabartë për të gjithë,” tha Dema në këtë takim, ku e potencoi faktin që UP-ja është në proces të transformimit të tij.

Në anën tjetër, Wieland u shpreh shumë i lumtur, për faktin që krijimi i standardeve zuri vend në fjalën prezantuese të rektorit Dema.
“Prodhoni studentë për t’u punësuar, prodhoni studentë të gatshëm për jetë si dhe të vullnetshëm për të kontribuuar dhe prosperuar,” ishte porosia e tij për menaxhmentin e universitetit.

Pas vizitës në rektorat, zëvendëspresidenti i PE-së vizitoi Fakultetin Juridik, ku ligjëroi para studentëve të UP-së temën me titull “Bashkimi Evropian – dje, sot, nesër”. Ligjërata u pasua me diskutim të hapur me studentë për çështje me interes për vendin.

Wieland, përveç funksionit si zëvendëspresident në Parlamentin Evropian, ka përvojë të gjerë në fushën e ligjit, teksa është edhe anëtar i Komitetit të Peticioneve.