YouTuberi realizon një test të gërvishtjes në modelin e ri dhe më të shtrenjtë 16 Pro Max të iPhone

iPhone i ri i Apple është prezantuar, por tashmë njerëzit po hasin probleme me pajisjen e shtrenjtë.

Një video e re nga YouTuberi JerryRigEverything tregon iPhone 16 Pro Max, më i shtrenjti nga katër modelet e reja, duke dështuar në testin e frikshëm të gërvishtjes.

Pamjet e dhimbshme zbulojnë butonin e ri të kapjes së kamerës së pajisjes që gërvishtet lehtësisht, pavarësisht se është i veshur me kristal safiri – një material i fortë dhe rezistent ndaj gërvishtjeve.

JerryRigEverything, emri i vërtetë i të cilit është Zack Nelson, është i njohur për kryerjen e një sërë testesh qëndrueshmërie në telefonat e rinj, duke përfshirë gërvishtjen dhe zjarrin, shkruan MailOnline, përcjell Telegrafi.

Pavarësisht nëse është një iPhone i ri, një orë inteligjente ose një kufje, pajisja e zgjedhur gërvishtet me një sërë mjetesh me majë, duke filluar nga më të butat dhe duke përparuar tek më të vështirat.

Më pas, YouTuberi shënon nivelin e fortësisë në të cilën pajisja fillon të shfaqë shenja gërvishtjeje, duke i ndihmuar konsumatorët të vendosin nëse do ta blejnë apo jo.

Me iPhone 16 Pro Max, butoni i kapjes fillon të tregojë shenja dëmtimi në nivelin 5 nga 9.

Kjo është disi e habitshme, pasi safiri i pastër ‘gërvishtet vetëm në tetë ose nëntë’.

Në pamjet që mund të rezultojnë torturuese për adhuruesit e iPhone, JerryRigEverything gërvisht xhamin dhe kornizën e hijshme prej titanit të telefonit me lehtësi.

Ndryshe, iPhone 16 fuqizohet nga çipat e rinj A18, të cilët janë të dizajnuar për detyra intensive të lidhura me AI. /Telegrafi/