Lojtari i ri i Interit, Petar Sucic bëri një debutim mbresëlënës në Serie A, duke regjistruar një asistim në fitoren bindëse 5-0 të Nerazzurrëve ndaj Torinos.
21-vjeçari, i cili mbërriti nga Dinamo Zagrebi në qershor, tregoi menjëherë një kimi të shkëlqyer me pjesën tjetër të ekipit dhe tashmë ka bërë katër paraqitje në Kupën e Botës për Klube.
Në një intervistë për serinë e klubit “On Board”, Sucic reflektoi mbi fillimet e tij modeste, duke zbuluar se si e kaloi fëmijërinë në fermën e familjes.
"U rrita në një fshat të vogël, në një qytet të vogël, me familjen time. Kemi një fermë të vogël, babait tim i pëlqen të rrisë lopë, kështu që kemi disa prej tyre. Kur isha fëmijë, ndonjëherë ndihmoja në mjeljen e tyre”, ka thënë fillimisht Sucic.
“Ishte argëtuese. Më pëlqente ajo mënyrë jetese, mendoj se kam pasur një fëmijëri të lumtur. Isha shumë i lumtur, e kaloja gjithë ditën jashtë. Kishim edhe kafshë të tjera. Kjo është një pjesë e jetës sime që do ta kujtoj gjithmonë".
Pse i shmang ai rrjetet sociale?
Ndryshe nga shumica e kolegëve të tij, Sucic dallohet edhe për mospërdorimin e rrjeteve sociale. Në këtë kohë, kur prania jashtë fushës është shpesh po aq e rëndësishme sa prania në fushë, vendimi i tij është i pazakontë dhe ai shpjegoi pse e mori këtë vendim.
“Nuk ka ndonjë arsye të veçantë. Thjesht nuk më pëlqen të humbas kohë në mediat sociale. Ato janë sigurisht një medium i dobishëm, por mund të humbasësh deri në pesë orë në ditë duke përdorur. Unë preferoj shumë më tepër të jetoj një jetë reale”.
“Ne jemi gjithmonë nën qendër të vëmendjes dhe të rrethuar nga vëmendja e medias dhe gazetarëve. Pas një ndeshjeje ose seance stërvitore kam nevojë të relaksohem, të fik trurin tim dhe të kaloj kohë me miqtë dhe familjen, kjo është arsyeja kryesore pse nuk jam në rrjetet sociale”, përfundoi mesfushori kroat. /Telegrafi/
