Vrasja e dy vëllezërve në Gjakovë, një muaj paraburgim për të dyshuarin

Është caktuar masa e paraburgimit ( një muaj ) për të pandehurin Gj.Gj, i cili dyshohet se ka vrarë dy vëllezërit në Gjakovë.

Gjykata Themelore në Gjakovë njofton se ka aprovuar kërkesën e Prokurorisë Themelore të Gjakovës, duke i caktuar masën e paraburgimit një (1) muaj të pandehurit GJ. Gj., për shkak të dyshimit të bazuar se ka kryer veprën penale të vrasjes së rëndë dhe mbajtjes pa autorizim të armës, transmeton Telegrafi.

Sipas kërkesës, “me datën 25 qershor 2023 rreth orës 20:20min në fshatin Madanaj të Gjakovës, me dashje ka privuar nga jeta të ndjerin H. I. dhe B. I., nga fshati Madanaj dhe këtë për shkak të
një kontesti pronësor”.

Lexo po ashtu Vriten dy vëllezër në Gjakovë

Në njoftim thuhet se, me këto veprime i pandehuri dyshohet se ka kryer dy vepra penale, ”Vrasja e rëndë” dhe veprën penale “Mbajtja në pronësi, kontroll ose posedim të paautorizuar të armëve”, vepra të sanksionuara me Kodin Penal të Republikës së Kosovës.

“Gjyqtari i procedurës paraprake Drilon Haraçia, në seancën dëgjimore të mbajtur në ambientet e spitalit ku i pandehuri gjendet për trajtim mjekësor, ka vlerësuar se janë përmbushur kushtet
ligjore për caktimin e masës së paraburgimit për të pandehurin në fjalë, ngase kemi të bëjmë me vepra penale të rënda”, thuhet në njoftim.

Gjykata bën të ditur se i pandehur do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 25 qershor 2023 dhe do të zgjasë deri më 25 korrik 2023.

Palët kanë të drejtën e ankesës ndaj këtij vendimi në Gjykatën e Apelit të Kosovës.

Ndryshe, vrasja në Gjakovë ka ndodhur ditën e diel. Policia kishte konfirmuar se vëllezërit janë vrarë me armë zjarri.

“Dy persona dyshohet të jenë qëlluar me armë zjarri rreth orës 20:20. Policia ka marrë informatën se bëhet fjalë për dy vëllezër – njëri ka vdekur në vendin e ngjarjes, ndërsa tjetri rrugës për në spital. Vdekjen e kanë konstatuar mjekët e emergjencës në Gjakovë”, kishte njoftuar Policia.

Ndërsa, nga Prokuroria kishin bërë të ditur se konflikti kishte ndodhur për çështje pronësore.