‘Vrasësi’ kapet në Google Street View, policët spanjollë ‘zgjidhin misterin e vrasjes’ – panë një imazh në internet të ‘trupit duke u ngarkuar në veturë’

Një mister vrasjeje në trekëndëshin e dashurisë është zgjidhur nga një foto makabre e Google Street View, që dyshohet se tregon një çantë duke u ngarkuar në një veturë.

Imazhi i jashtëzakonshëm, i cili është ende i disponueshëm në Google Maps, tregon dikë që përkulet mbi një thes të bardhë në bagazhin e një veture të kuqe në fshatin Calle Norte në Tajueco, Spanjë.

Policia thotë se fotografia, e kapur pa dashje nga një veturë me kamerë të Google, ka qenë vendimtare për të zgjidhur rastin e  vrasjes së një burri të zhdukur, trupi i të cilit është gjetur që atëherë i copëtuar.

Shtetasi kuban, 33 vjeç, u raportua i zhdukur nga vëllai i tij në nëntor 2023, dhe policia po përpiqej ta gjente burrin prej muajsh.

Eshtrat e tij të copëtuara u gjetën në varrezat e Tajueco javën e kaluar, transmeton Telegrafi.

Burri thuhet se kishte udhëtuar në provincën Soria për të kërkuar gruan e tij, e cila tashmë jetonte në atë zonë.

Por gruaja e tij, gjithashtu kubaneze, thuhet se kishte hyrë në një marrëdhënie me fqinjin e saj spanjoll, i cili njihet në vend si El Lobo de Tajueco dhe drejtonte një bar në një qytet aty pranë.

Vëllai i viktimës tha se mesazhet e fundit që mori prej tij, përmendnin takimin e burrit me një grua dhe planin për të hequr qafe telefonin e tij.

Mesazhet thuhet se e alarmuan atë dhe kur nuk mori më vesh nga vëllai i tij, ai e raportoi atë të zhdukur.

Policia hetoi zhdukjen dhe kontrolloi prona të ndryshme në Soria, duke përfshirë gërmimet pranë shtëpisë së njërit prej të dyshuarve.

Një gjykatës vendas kishte urdhëruar që çështja të mbetej sekret, ndërsa policia njoftoi zbulimin e trupit të burrit vetëm të martën.

Vetëm 50 njerëz jetojnë në qytetin e vogël në provincën e Sorias. /Telegrafi/