Vetëvendosje në Prizren kërkon llogaridhënie për premtimet e papërmbushura të kryetarit Totaj

Qendra e Lëvizjes Vetëvendosje në Prizren ka vlerësuar se kryetari i Komunës së Prizrenit, Shaqir Totaj ka premtuar shumë projekte në fushatën paraelektorale dhe se të njëjtat nuk i ka realizuar gjatë mandatit qeverisës.

“Shaqir Totaj, kryetar i Prizrenit, fushatën zgjedhore e nisi dhe e përfundoi me premtime të mëdha dhe pritshmëri të larta! Na premtoi transformimin e parkut të qytetit, një parking nëntokësor për 711 vetura, dhe rregullimin e shtratit të Lumëbardhit – projekte që qytetarët i mirëpritën. Mirëpo, sa kohë ka kaluar dhe ku janë rezultatet?”, thuhet në reagimin e LVV-së në Prizren.

Ky subjekt politik tutje ka shprehur qëndrimin se “Parku i Qytetit vazhdon të mbetet i paprekur e në gjendje të mjerueshme”, pastaj se “parkingu nëntokësor jo vetëm që nuk u realizua por u shndërrua në simbol të premtimeve boshe dhe projekteve të harruara”.

“Rregullimi i shtratit të Lumëbardhit nuk filloi asnjëherë e për më tepër nuk mirëmbahet e nuk e ka kujdesin e duhur”, thuhet në reagim.

Në të njëjtën kohë nënvizohet se premtimet duhet të përmbushen për hir të qytetarëve.

“Qytetarët e Prizrenit meritojnë të shohin përmbushjen e këtyre premtimeve, e jo vetëm fjalë boshe dhe projekte të ngecura në letër. A është ky transformimi që na u paraqit e premtua nga Shaqir Totaj? Prizreni është qytet historik dhe simbol i kulturës. Prizreni ka nevojë për një kryetar që punon, e jo që mashtron!”, thuhet në reagim e LVV-së.

Mirëpo disa javë më parë kryetari i Komunës së Prizrenit, Shaqir Totaj teksa ka ndarë me publikun përditësimin e bërë nga Instituti GAP të shkallës së përmbushjes së premtimeve zgjedhore deri në qershor të këtij viti ka theksuar se afër gjysma e tyre janë përmbushur në tërësi.

“Sipas të dhënave, nga gjithsej 78 premtime të qeverisjes aktuale lokale në Komunën e Prizrenit, 36 premtime janë përmbushur plotësisht (afër 50%), 20 premtime janë gjysmë të përmbushura (afër 25%), 15 janë në fazën fillestare të realizimit (rreth 16%) dhe 7 premtime ende nuk kanë filluar (9%)”, pat bërë të ditur Totaj.

Përveç këtyre premtimeve, sipas kryetarit Totaj, Komuna e Prizrenit ka realizuar me qindra projekte të rëndësishme që nuk kanë qenë pjesë e premtimeve elektorale, por që kanë kontribuar në përmirësimin e jetës së qytetarëve. /Telegrafi/