Venezuela rishikon normën e këmbimit të monedhave, pagat dhe pensionet

Presidenti i Venezuelës Nicolas Maduro ka njoftuar një normë të vetme të këmbimit dhe e lidhi atë me petro kriptomonedhën e qeverisë socialiste, që është zhvlerësuar me rreth 96%.

Maduro tha se do të rishikojë normat e ndryshme të këmbimit në Venezuelë, pagat, pensionet dhe çmimin e monedhës petro, një kriptomonedhë që u hodh në treg nga qeveria në fillim të këtij viti.

Sipas presidentit të Velezuelës, 1 petro do të ketë një vlerë prej 60 dollarësh ose 360 milionë bolivarë. Kjo nënkupton automatikisht një normë të re të këmbimit, prej 6 milionë bolivarë për 1 dollarë, duke sjellë një zhvlerësim prej 96%, krahasuar me normën aktuale prej 248 mijë bolivarë për dollar.

Që nga viti 2003, Venezuela ka pasur kontrolle strike të valutës, që cilësohet nga ekonomistët si një ndër arsyet kryesore të krizës aktuale ekonomike, që ka sjellë hiperinflacion dhe e ka bërë monedhën bolivar thuajse të pavlerë. Fondi Monetar Ndërkombëtar parashikon se inflacion në Venezuelë do të prekë nivelin e 1 milionë për qind deri në fund të këtij viti.

Në anën tjetër, ekspertët e kriptomonedhave kanë shprehur dyshime në lidhje me funksionimin e petro si një instrument financiar. Gjithsesi, presidenti Maduro deklaroi se këto masa do të përballojnë “luftën ekonomike” që sipas tij po zhvillohet me fuqitë perëndimore. /Telegrafi/