Botë Nga Bota Afrika

Vala e re e vrasjeve masive në Sudan alarmon OKB-në

Para 3 muajve

Një zyrtare e lartë e OKB-së në Sudan tha se është thellësisht e shqetësuar nga raportet për “krime mizore” në shtetin qendror Gezira, duke përfshirë vrasjen masive të civilëve nga Forcat paraushtarake të Mbështetjes së Shpejtë (RSF).

Komentet e Clementine Nkweta-Salami erdhën pasi një grup aktivist tha se të paktën 124 njerëz u vranë nga RSF në sulmet ndaj fshatrave gjatë javës së kaluar.

RSF ka mohuar të ketë shënjestruar civilët, duke thënë se luftëtarët e saj po përleshen me milicitë e armatosur nga ushtria.

Bëhet e ditur se konflikti 18-mujor në Sudan ka vrarë dhjetëra mijëra njerëz dhe ka zhvendosur më shumë se 11 milionë.

Gezira u shndërrua në një fushëbeteje të madhe javën e kaluar pasi RSF pësoi një goditje kur një nga komandantët e saj, Abu Aqla Kayka, dezertoi në ushtri.

Ushtria tha se ai kishte sjellë “një numër të madh të forcave të tij” me vete, në atë që e përshkroi si dezertimin e parë të profilit të lartë.

Në përgjigje, RSF tha se luftëtarët do të mbroheshin dhe “do të merreshin me vendosmëri me këdo që mbante armë”, shkruan BBC, përcjell Telegrafi.

Nkweta-Salami, Koordinatorja e Përhershme dhe Humanitare e OKB-së në Sudan, tha se raportet paraprake sugjeronin se RSF kishte kryer një sulm të madh në të gjithë shtetin midis 20 dhe 25 tetorit.

Ajo shtoi se kjo çoi në vrasje masive, përdhunim të grave, plaçkitje të gjerë të tregjeve dhe shtëpive dhe djegie të fermave.

Gjithashtu, Nkweta-Salami tha se “krimet mizore” ishin në një shkallë të ngjashme me ato që u panë në rajonin e Darfurit të Sudanit vitin e kaluar, kur RSF u akuzua për “spastrim etnik”.

Sipas koordinatores, numri i të vdekurve është ende i paqartë, por raportet paraprake sugjeruan se dhjetëra njerëz u vranë në Gezira.

Në një deklaratë, Komiteti i Rezistencës Wad Madani, i cili bën fushatë për t’i dhënë fund konfliktit në Sudan, tha se RSF po kryente “masakra të gjera në një fshat pas tjetrit”.

Edhe sindikata e mjekëve sudanezë i bëri thirrje OKB-së që të shtyjë të dy palët në konflikt që të bien dakord për korridore të sigurta humanitare në fshatrat që po përballeshin me “gjenocidin” nga duart e RSF.

Sindikata e mjekëve shtoi se operacionet e shpëtimit ishin bërë të pamundura dhe se ushtria ishte “e paaftë” për të mbrojtur civilët.

Ndryshe, konflikti në Sudan shpërtheu në prill të vitit 2023 pas një përplasjeje midis komandantëve të RSF-së dhe ushtrisë, përkatësisht gjeneralit Mohamed Hamdan Dagalo dhe gjeneralit Abdel Fattah al-Burhan.

Të dy së bashku kishin organizuar një grusht shteti në vitin 2021, duke prishur tranzicionin e Sudanit drejt demokracisë, por më pas u përfshinë në një luftë të egër për pushtet.

Të dy udhëheqësit kanë refuzuar të nënshkruajnë një marrëveshje paqeje, pavarësisht përpjekjeve të SHBA-së dhe Arabisë Saudite për të ndërmjetësuar përfundimin e konfliktit. /Telegrafi/