Universiteti “Ukshin Hoti” bëhet pjesë e projektit të ITP Prizren për inovacionin digjital

Universiteti “Ukshin Hoti” në Prizren ka njoftuar se ka nënshkruar marrëveshjen për të qenë pjesë e projektit “Digital Innovation Gateway for Kosovo DIG-4K”, që zbatohet nga Parku i Inovacionit dhe Trajnimeve. Ky institucion i arsimit të lartë ka theksuar se vlera e projektit është rreth 1 milionë euro, dhe paraqet një iniciativë transformuese që financohet nga Bashkimi Evropian dhe Qeveria e Kosovës.

“Projekti synon përshpejtimin e inovacionit digjital në Kosovë dhe do të implementohet nga ITP Prizren, në bashkëpunim me sektorin privat, akademinë dhe shoqërinë civile. “DiG-4K” do të mbështesë NVM-të, startup-et, institucionet publike dhe komunitetet, duke krijuar një ekosistem të qëndrueshëm për inovacionin digjital”, thuhet në njoftim, raporton Telegrafi.

Në të njëjtën kohë theksohet se me këtë lloj nismash synohet zhvillimi rajonal.

“Me iniciativa të tilla që fuqizojnë aftësitë digjitale, Universiteti i Prizrenit po luan një rol kyç në formësimin e Kosovës si një qendër rajonale e inovacionit digjital”, thuhet në njoftimin e Universitetit.

Nisma në fjalë udhëhiqet nga Parku i Inovacionit dhe Trajnimeve (ITP Prizren) dhe ka për qëllim ta pozicionojë Kosovën si një qendër për inovacion dhe trajnim digjital, raporton Telegrafi.

Objektivat e projektit, sipas njoftimit të publikuar nga institucionet e BE-së, përqendrohen në fuqizimin e bizneseve lokale, institucioneve arsimore, organizatave të shoqërisë civile dhe aktorëve publikë, duke krijuar kështu një ekosistem që mbështet suksesin ndërmarrës dhe nxit inovacionin digjital në nivel lokal, kombëtar dhe rajonal.

Projekti, sipas këtij përshkrimi, synon t’u përgjigjet nevojave të popullsisë së Kosovës, duke u përqendruar në përmirësimin e aftësive digjitale, mbështetjen e ndërmarrësisë dhe promovimin e adoptimit të teknologjive digjitale në sektorë të ndryshëm. /Telegrafi/