“Unë isha e martuar me një astronaut Apollo, ai besonte se nuk jemi vetëm”, gruaja e njeriut që shkeli Hënën zbulon sekretet që ai ndau para se të vdiste

Gruaja e një ish-astronauti të Apollo ka zbuluar disa nga sekretet që i shoqi ndau para se të vdiste.

Anita Mitchell, gruaja e pilotit të ndjerë të NASA-s Edgar Mitchell, i cili u bë njeriu i gjashtë që eci në Hënë në vitin 1971, zbuloi se burri i saj gjithmonë besonte në ekzistencën e UFO-ve.

Sipas saj, shumë astronautë dhe pilotë kishin qenë dëshmitarë të fenomeneve të pashpjegueshme gjatë misioneve të tyre.

Ajo tha se disa nga kolegët astronautë të Edgar, duke përfshirë shokun e ekuipazhit të Apollo, James McDivitt, gjithashtu raportuan se kishin parë objekte të çuditshme ndërsa ishin në hapësirë.

Disa madje u ndeshën me mjete të pazakonta gjatë fluturimit të aeroplanëve konvencionalë mbi Tokë, përcjell Telegrafi.

“Më kujtohet Gordy, astronauti Gordon Cooper Jr. duke na thënë në një darkë në shtëpinë tonë se kishte parë diçka”, tha Mitchell.

“Ai tha, dëgjo, ne nuk kemi asgjë që ecë kaq shpejt dhe shkon kaq lart”, kujton ajo.

Edgar Mitchell, një ish-kapiten i marinës amerikane, ishte pjesë e ekuipazhit të Apollo 14 dhe u bë një nga 12 astronautët që eci në Hënë në 1971.

Anita, ka ndarë përvojat e saj personale dhe historitë që mësoi nga astronautët e tjerë të hershëm të NASA-s në librin e saj të ri, You Don’t Look Like An Astronaut’s Wife.

Edgar ndërroi jetë në vitin 2016, pak para 45 vjetorit të uljes së tij historike në Hënë.

Para vdekjes së tij, Mitchell ishte i zëshëm në lidhje me besimin e tij se qeveria amerikane po fshihte informacionin në lidhje me UFO-t.

Në vitin 2009, ai bëri thirrje publikisht për publikimin e informacionit të klasifikuar, duke shprehur besimin e tij në realitetin e jetës aliene.

Sipas gruas së tij, shumë nga astronautët që ajo takoi gjatë kohës së burrit të saj në NASA ndanë mendimin se kishte “diçka” përtej të kuptuarit njerëzor për sa i përket teknologjisë.

Ajo tani ndan besimin e burrit të saj, duke shtuar: “A mendoni vërtet se ne jemi inteligjenca e vetme në univers? Sepse nëse jemi ne, universi është në telashe.” /Telegrafi/