UEFA merr vendimin revolucionar për pronësinë e shumëfishtë të klubeve

Organi i Kontrollit Financiar të UEFA-s ka njoftuar këtë të premte se klubet që kanë të njëjtin pronar do të mund të luajnë pa problem në garat evropiane.

Këtë sezon, ishte rasti me Aston Villa (Angli) dhe Vitoria de Guimaraes (Portugali); Brighton (Angli) dhe Saint-Gilloise (Belgjikë); dhe Milani (Itali) dhe Toulouse (Francë).

UEFA shpjegon se e lejon këtë, sepse klubet kanë zbatuar “ndryshime të rëndësishme nga klubet dhe investitorët e tyre”, përcjell Supersport.

Këto ndryshime, të cilave u referohen, janë reduktimi i aksioneve të investitorëve në një nga klubet apo edhe kalimi i kontrollit dhe vendimmarrjes efektive të një prej klubeve te një palë e pavarur; kufizime në aftësinë për të financuar më shumë se një klub; të mos ketë përfaqësim në bordin e drejtorëve, as aftësi për të emëruar zyrtarë të rinj në më shumë se një klub, për të marrë pjesë në asamblenë e përgjithshme, për të marrë pjesë në vendime kyçe si miratimi i buxheteve ose për të ushtruar kontroll mbi bordin e drejtorëve ose asambletë përmes të drejtat e vetos ose marrëveshjet kontraktuale të lidhura me aksionarët e tjerë.

Përveç kësaj, këto klube kanë pranuar që asnjë lojtar të mos transferohet te njëri-tjetri, drejtpërdrejt ose tërthorazi, deri në shtator 2024; se ata nuk do të bashkëpunojnë ose të hyjnë në marrëveshje të përbashkëta teknike ose tregtare; as nuk do të përdorin skautët apo bazat e të dhënave të përbashkëta.

Për ta bërë këtë, UEFA siguron se do të monitorojë gjashtë klubet që janë në këtë situatë këtë sezon.