Trump: Po ta dëgjoja Boltonin, tani do të ishim në Luftën e Gjashtë Botërore!

Presidenti i Shteteve të Bashkuara të Amerikës, Donald Trump, ka deklaruar për ish-këshilltarin për Siguri Kombëtare, John Bolton, se po të kishte qëndruar ky i fundit në pozitën e tij do ta çonte Amerikën në luftën e gjashtë botërore.

Presidenti Trump këtë reagim e ka bërë përmes disa publikimeve në rrjetin social Twitter, teksa Bolton ka vendosur të publikojë një libër që mund ta dëmtojë “mbrojtjen e fajësisë” së Trumpit.

Trump më tutje është deklaruar se Bolton kohë më parë i është lutur për një punë jo të aprovuar nga Senati, të cilën ai ia kishte dhënë, pavarësisht kundërshtimeve të shumta, shkruan euronews, përcjell Telegrafi.

Ndërkohë, siç shkruan zëri i Amerikës, presidenti Trump shkruan se zoti Bolton, i cili e la postin e këshilltarit të sigurisë kombëtare në shtator, “menjëherë pas kësaj shkroi një libër të pandershëm dhe të pavërtetë me informacione të klasifikuara”.

Të mërkurën, e përditshmja New York Times ka lëshuar një dorëshkrim lidhur me librin e ri të Bolton kushtuar presidentit Trump, andaj edhe ky i fundit ka shpërthyer me kritika në Twitter.

Siç njofton gazeta Nju Jork Tajms, në dorëshkrimin e tij, zoti Bolton e kundërshton versionin e dhënë nga Presidenti Trump për çështjen e ndihmës ushtarake prej 391 milion dollarësh ndaj Ukrainës.

Sipas gazetës, ai thotë se presidenti e bllokoi ndihmën deri sa Ukraina të fillonte hetimet ndaj ish-nënpresidentit Joe Biden dhe të birit të tij Hunter. /Telegrafi/