Presidenti amerikan Donald Trump raportohet se i tha kryeministrit izraelit Benjamin Netanyahu të martën, se vendimi për të sulmuar brenda territorit të aleatit të SHBA-së nuk ishte i mençur, raportoi The Wall Street Journal, duke cituar zyrtarë të lartë të administratës.
Kryeministri izraelit u përgjigj duke thënë se kishte një dritare të shkurtër për të nisur sulmin ajror dhe shfrytëzoi rastin, transmeton Telegrafi.
Një telefonatë e dytë midis dy udhëheqësve më vonë atë ditë ishte e përzemërt, me Trump që e pyeti Netanyahu nëse sulmi kishte qenë i suksesshëm.
Izraeli u përpoq të vriste udhëheqësit politikë të grupit islamist Hamas me sulmin në kryeqytetin e Katarit, Doha, të martën.
Hamasi ka thënë se udhëheqësit e tij kryesorë i mbijetuan sulmit ajror, por pesë anëtarë u vranë, përfshirë djalin e kreut të saj në Gaza dhe negociatorit kryesor Khalil al Hayya.
Operacioni ushtarak izraelit në Doha është dënuar gjerësisht ndërkombëtarisht dhe ishte veçanërisht i ndjeshëm, pasi Katari ka qenë mikpritës dhe ndërmjetësues në negociatat që po përpiqen të sjellin një armëpushim në luftën në Gaza.
Të mërkurën, Netanyahu e paralajmëroi Katarin që ose të dëbojë zyrtarët e Hamasit ose "t'i çojë ata para drejtësisë. Sepse nëse nuk e bëni ju, ne do ta bëjmë".
Katari i është kundërpërgjigjur, duke thënë se komentet e tij në lidhje me kombin e Gjirit që strehon një zyrë të Hamasit, ishin "të pamatura".
Ndërkohë, ambasadori izraelit në SHBA, Yechiel Leiter, ka thënë se nëse Izraeli dështon të vrasë udhëheqësit e Hamasit të martën, do të ketë sukses herën tjetër.
"Ne i kemi paralajmëruar terroristët, kudo që të jenë do t'i ndjekim ata dhe do t'i shkatërrojmë ata që do të na shkatërrojnë", tha ai.
Sulmi ajror ndodhi menjëherë pasi Hamasi mori përgjegjësinë për të shtënat e së hënës në një stacion autobusi në periferi të Jerusalemit, që vrau gjashtë persona. /Telegrafi/
