Tripunovski: Duhani këtë vit është blerë me çmim mesatar prej 374 denarë

“Sot jam për vizitë në rajonin e Prilepit, në Kombinatin e Duhanit, për të bërë inspektimin e procesit të grumbullimit të duhanit për të korrat e vitit 2024. Edhe pse afati i fundit ligjor deri më 15 dhjetor nuk ka mbërritur ende, shohim se një pjesë e duhanarëve e kanë dorëzuar prodhimin e tyre”, theksoi Ministri i Bujqësisë, Pylltarisë dhe Ekonomisë së Ujërave, Cvetan Tripunovski, nga Prilepi.

Ai tha se sipas të dhënave të regjistruara në sistem, deri dje janë grumbulluar 1,400,000 kilogramë duhan me çmim mesatar prej 374.30 denarë, duke shtuar se deri tani janë paguar rreth 45% e fermerëve.

Ministri Tripunovski shtoi se Inspektorati i Bujqësisë po e ndjek nga afër këtë proces.

“Ne si ministri jemi në komunikim të vazhdueshëm me të gjitha shoqatat. Po e ndjekim gjithë procesin dhe që nga java e ardhshme presim një rritje të dorëzimit të duhanit nga të korrat e këtij viti. Duhanarët nuk duhet të shqetësohen, sepse këtë vit do të kemi një çmim mesatar më të lartë për grumbullimin krahasuar me vitin e kaluar,” siguroi ministri Tripunovski.

Ai theksoi se si Qeveri dhe si Ministri janë në komunikim të vazhdueshëm me grumbulluesit, prodhuesit e duhanit dhe të gjitha shoqatat që veprojnë në këtë sektor. Gjatë deklaratës së tij, ministri theksoi se këtë vit nuk do të ketë asnjë prodhues të duhanit të pakënaqur. Ministria nuk do të lejojë zhgënjime si ato që ndodhën në të kaluarën.