Tri mësuese nga Gjilani, një ëndërr të përbashkët – botuan librat që mësojnë sjelljen dhe komunikimin për tri nivelet e para shkollore

“Ka qenë një ëndërr e kahmotshme, prej 25 vitesh, të shkruanim një libër për nxënësit” thonë mësimdhënëset e shkollës “Thimi Mitko” në Gjilan, Vlora Jakupi, Gëzime Sahiti dhe Yllka Behluli.

Nga përvoja e tyre shumëvjeçare në mësimdhënie, ato kanë realizuar një projekt të rëndësishëm për arsimin fillor, duke sjellë librin “Sjellja dhe Komunikimi” për tri nivelet e para shkollore. Vlora Jakupi ka botuar librin për nxënësit e klasës së parë, Gëzime Sahiti për klasën e dytë dhe Yllka Behluli për klasën e tretë.

Ky rrugëtim për botimin e këtyre librave ka qenë një proces i gjatë dhe i përkushtuar, të cilin tri mësimdhënëset e rrëfejnë për Telegrafin, duke treguar sesi puna dhe bashkëpunimi i tyre i palodhshëm bënë realitet ëndrrën e kahershme.

Vlora Jakupi, autore e librit “Sjellja dhe Komunikimi 1”, thotë se përmbajtja e këtyre librave është kryesisht e njëjtë për të gjitha nivelet, duke u fokusuar në edukimin e sjelljes së mirë.

“Temat që trajtohen në librin ‘Sjellja dhe Komunikimi 1’ janë kryesisht sjellja e mirë, rregullat në klasë, në rrugë dhe në vende të ndryshme. Këto të gjitha janë të ilustruara me figura dhe foto, gjë që e bën librin shumë tërheqës për fëmijët e klasës së parë. Përveç këtyre, ka edhe hapësira ku ata do të shkruajnë, ngjyrosin dhe realizojnë lojëra të ndryshme në klasë,” ka thënë Jakupi për Telegrafin.

Ajo thekson se, krahas përvojës së saj shumëvjeçare si mësimdhënëse, për të përfunduar këtë libër i janë dashur më shumë se tre muaj punë intensive.

Ideja për këtë botim lindi nga vëzhgimet e saj gjatë punës në shkollë, duke parë se komunikimi dhe sjellja e mirë janë thelbësore për zhvillimin e nxënësve, qoftë në aspektin fizik, emocional apo akademik.

Jakupi shprehet se ky është libri i saj i parë i botuar, por aspak i fundit.

“Ky është libri im i parë, por jo i fundit. Shpresoj të vazhdoj edhe me shkrime të tjera që janë në interes të fëmijëve dhe shoqërisë në përgjithësi,” ka thënë ajo.

Një tjetër botim i rëndësishëm është edhe libri “Sjellja dhe Komunikimi 2”, autorja e të cilit është Gëzime Sahiti.

Ajo shpjegon se ky libër synon që nxënësit, gjatë vitit shkollor 2025/26, të kenë në duart e tyre një burim të vlefshëm për të mësuar rreth sjelljeve të mira.

“Libri ‘Sjellja dhe Komunikimi 2’ është një libër që synon t’i ndihmojë nxënësit të mësojnë për sjelljet e mira në shkollë, shtëpi dhe komunitet, si dhe t’i inkurajojë ata që gjatë komunikimit të përdorin sa më shpesh fjalët magjike ‘Të lutem’, ‘Më fal’ dhe ‘Faleminderit’,” thotë Sahiti për Telegrafin.

Ajo thekson se ky është libri i saj i parë për nxënësit, por jo dhe për arsimin në përgjithësi. Sahiti ka botuar më parë edhe manuale trajnimi për mësimdhënësit në Kosovë.

Sipas saj, realizimi i këtij libri ka qenë një ëndërr e kahershme, por puna intensive për ta jetësuar këtë libër ka nisur që nga shtatori i vitit 2024.

Dhe, libri “Sjellja dhe Komunikimi” për klasën e tretë, i botuar nga mësimdhënësja Yllka Behluli, sjell gjithashtu një përmbajtje të pasur që synon edukimin dhe zhvillimin e fëmijëve që në moshë të hershme.

“Ky libër edukativ e shkollor për lëndë me zgjedhje i dedikohet sjelljes dhe komunikimin dhe është një burim mësimor që mund të ndihmojë nxënësit të kuptojnë se si të ndërveprojnë në mënyrë pozitive dhe efektive me të tjerët; në një mjedis shoqëror, familjar dhe shkollor”, thotë Behluli për Telegrafin.

Ajo tregon se botimi i këtij libri ishte një dëshirë dhe ëndërr e kahmotshme, e lindur 25 vjet më parë, që kur filloi të punojë si mësuese.

Si rezultat i diskutimeve të shumta me koleget e saj, Gëzimen dhe Vlorën – autore të librave për klasën e parë dhe të dytë, dhe pas një bashkëpunimi intensiv me shtëpitë botuese, ato morën një ftesë nga drejtuesit e “Magjia e Librit” për të shkruar libra për lëndën me zgjedhje.

“Me shkrimin e librit po merremi prej disa muajsh, por falë përvojës së gjatë në mësimdhënie, arritëm t’i përfundojmë librat në kohë, me përkushtim dhe cilësi,” shprehet Behluli.

Ndër të tjera, ajo thekson se prej vitesh është trajnere e kurrikulës së re, vlerësuese e librave dhe recensente, por ndjenja që përjeton gjatë shkrimit të librave për nxënësit është tjetër nivel.

Behluli thotë se ky është libri i saj i parë për nxënësit, por paralelisht po punon për botime të tjera për fëmijë.

Vlora, Gëzimja dhe Yllka, tri mësimdhënëse që i sollën fëmijëve këto libra për t’u lehtësuar konceptin e sjelljes dhe komunikimit, synojnë të vazhdojnë punën e tyre me botime të reja që trajtojnë tema të ndryshme në të mirë të gjithë shoqërisë. /Telegrafi/