Tregtia e armëve të vogla arrin në 5.8 miliardë dollarë – ja kush janë blerësit dhe shitësit më të mëdhenj!

Gjermania dhe Britania e Madhe në vitin 2013 kanë qenë eksportuesit më transparentë të armëve të vogla, ndërsa Irani, Koreja e Veriut, Arabia Saudite dhe Emiratet e Bashkuara Arabe nuk kanë dhënë asnjë informacion për eksportin e tyre.

Raporti mbi tregtinë e armëve të vogla dhe të transparencës, gjë e cila u analizua në vitin 2013, tregon se në bazë të të dhënave në dispozicion, tregtia në këto armë ka arritur 5.8 miliardë dollarë, një rritje prej 17 për qind krahasuar me vitin 2012, transmeton Telegrafi.

Po sipas këtyre të dhënave, SHBA-të, Italia dhe Gjermania janë shitësit më të mëdhenj, me eksportet që arrijnë më shumë se 500 milionë dollarë.

Gjithashtu thuhet se Shtetet e Bashkuara janë blerësi më i madh, me një vlerë të importit që arrin shumën prej 2,5 miliardë dollarëve.

Ndërkaq, siç shkruajnë mediat e huaja, përcjell Telegrafi, në Lindjen e Mesme në vitin 2013 janë dërguar 84 për qind më shumë armë të vogla se një vit më parë, dhe ky rajon për armë të tilla ka shpenzuar 630 milionë dollarë.

Në krye të barometrit të transparencës të eksportuesve të armëve janë Gjermania dhe Mbretëria e Bashkuar me 19,75 nga 25 pikë.

Irani, Koreja e Veriut, Arabia Saudite dhe Emiratet e Bashkuara Arabe janë në fund me zero pikë. /Telegrafi/